Cinîyê tepişteyî yê ke Zîndanê Cinîyan ê Kayserî de kewtê xoverdayîşê grevê vêşanîye yê bêdem û bêagêrayîşî vanê heta tecrîdkerdişê Ocalanî nêqedîyo do peynîya çalakîya xo nêarê û fek waştişanê xo ra vera nêdê.
Zîndanê Cinîyan ê Kayserî de cinîyê esîrî bi amacê qedînayîşê tecrîdê serê Rayberê Şarê Kurdî Abdullah Ocalanî 5'ê Çele ra nata grevê vêşanîye de yê. Xoverdayoxê ke grev de yê Bêrîvan Bîtmene, Maşallah Erbeye, Mêrgê Polate, û Sînem Oguze, Yazgul Şahîne û Yaprak Taşçî yê ke 25'ê Çele ra nata grev de yê veng da rayapêroyîye. Tepişteyê ke her roja ke şina halê înan ê weşîye xirabêr bena her kesî ra waştî ke vengê înan bieşnawê.
Keyeyanê ke 5'ê Adare de merdimanê xo reyde pêvînayîş kerd, ard ziwan ke xoverdayoxî bi zorî payan vindenê, xeylî kîloyî dayê û wucûdê înan de birînî vejîyayê. Tepişteyanê ke bi rayîrê keyeyanê xo hayîdarîyî dayî vat, "Pîya bi problemê tansîyonî, pirodayîşê zerrî heta 60 kewto. Şekirê ma kemî yo. Vîtamînî goreyê îhtîyacîye nênê dayene. Bi hawayêkê keyfîyî rojnameyan nêdanê ma. 1'ê Adare ra nata embazê ma yê bînî zî tewrê çalakîye bîyî. Moralê ma berz o. Ma do nê xoverdayîşê xo bi serkewtiş tacîdar bikerê."
Tepişteyan da zanayene ke waştişê înan heqdar û rewa yê û wina vat, "Ma xoverdayîş û çalakîyêka rewaye kenê. Çalakîya ma çende şina vila bena. Ganî her kes paştî bido na çalakîya ma. Heta ke Ocalan azad nêbo do çalakîya ma dewam bikero. Heta ke waştişê ma nêrê qebûl kerdene do dewam bikero. Ma do bi ser bikewê. Ma cuyêka bê Ocalanî qebûl nêkenê. Hem keyeyê ma hem zî rayapêroyîye ganî veng bidê vengê xoverdayîşê ma. Eke merg estbo zî ma do waştişanê xo ra fek vera nêdê."
