Wezîrê Karanê Zereyî 19'ê Temmuze de qeyûm tayînê Şaredarîyanê Amed, Wan û Mêrdinî kerd.Kurdistanî de dimayê tayînkerdişê qeyûman serê Amed, Wan, Mêrdînî rê razînêbîyayîş û reaksîyonanê şarî dest pêkerd. Pêro doman, ciwan û pîrî zend û bendê xo da xo ra û nê şaristanan de vejîyayê kuçeyan. Nê çalakîyan de tewr zaf Dadîyê Laçiksipî bale ancenê xo ser.

Nê dadîyan ra zî yewe zî Aklîme Hanasa ke pê xoverdayîşê xo bîya sembol û raybera çalakgeran. Hanase wextê grevê vêşanîye yê verba tecrîdê Rayberê Şarê Kurdî Abdullah Ocalanî de zî her çalakîye de cayê xo girewtêne û bi şîara 'Ma do pê xoverdayîşî ser bikewê' cayê xo hişê merdiman de girewtêne. Hanase pê vengê xo yo weş û slogananê xo cayê çalakîyan de veng dana.

Aklîme Hanase Kam A?

Aklîme Hanas serra 1962 de dewa Karwazî ya Licê de ameye dinya û zafêna domantîya xo Karwaz de vîyarna. Hanase, serra xo ya 15'ine de ameye zewijnayene û sey veyve şîya dewa Bominte. Hanase heta serra 1993 Bominte de mîyanê şert û mercanê zehmetan de ciwîyaye. Rîyê polîtîkayanê gemarinan ê dewleta Tirkî ra serra 1993 de bi seyan dewê Kurdistanî ameyî vêşnayene û werankerdene. Dewa Bominte ya Licê zî nê dewan ra yew a. Hanase serra 1993 de rîyê pê zorbazî hetê leşkeran ra dewa xo ra ameye vetene û dewa aye ameye vêşnayene. Dima Hanase neçar bîya û mecbur menda ke keyeyê xo bar bike Sûrê Amedî. A roje ra nata keyeyê xo reyde Sûr de ciwîyena. Hanase dadîya şeş domanan a û nika taxa Şehîtlîkî û Yenîşehîrî de manena.

Verba Neheqîye Ganî Xoverdayîş Bêro Xurtkerdene

Hanase ard ziwan ke qeyûm seke beranê şaredarîye pê bend û dêsan girewt û vat, "Mabênê 5 menganê peyênan de şarê Amedî xizmet dî û berê şaredarîye şarî rê akerde bî. Wextê HDP'yî de şaredarîye yê şarî bî. Nika şaredarî ameye derûdorgirewtene û merdim nêşkeno bendan ra bivîyaro û şêro şaredarîye. Ma do heta çi wext bêveng bimanê? Eke ma verba qeyûman bêveng bimanê, ê do siba qeyûm tayînê keyeyê ma zî bikê. Cigera mi veşena. Ez seba heqê xo tîya ya. Ez do heta peynîye bigêra heqê xo. Ez dizd nîya, mi dest nêna heqê çewî ser. Ganî çew verba dizdîyan û destsernayîşan bêveng nêmano"