Îstanbul, Kerboran, Denîzlî û Mersîn de destsernayîşê îradeyî ame şermezarkerdene.

Îstanbul de Hêzanê Kede, Haştîye û Demokrasîyî Maltepe de û Platformê Dezgehanê Demokratîkan Okmeydani de destsernayîşê îradeyî şermezar kerd.

Okmeydani de Wekîla DEM Partî Kezîbane Konukçu qisey kerd û pare kerd ke qeyûm teyna meseleya kurdan ney meseleya pêro şaran a. Kezîbane vat: ''Ma do vera qeyûman têkoşînî pîlêr  bikerê.''

Şaredarê Şîşlî yê CHPyî Tamer Ozcanliyî zî îfade kerd ke îqtîdar keno ke bi polîtîkaya qeyûman îradeyê şarî teslîm bigêro.

Maltepe de Hemserekê DEM Partî yê qeza Taner Mutluyî dîyar kerd ke qeyûmî do şorê la  ê do bimanê.

Qezaya Kerboranî ya Mêrdînî de şarî rayraşîyayîş kerd. Rayraşîyayîşî ra dima Hemşaredara Mêrdînî Devrîme Demîr û Wekîlê DEM Partî Kamuran Tanhanî qisey kerd. Devrîme ard ziwna ke şar neheqîya bi nameyê qeyûman qebul nêkeno û vat: ''Ma do nêverdê ke ameyoxê şarê ma bidizîyo.'' Tanhanî zî vat ke çareserîya meseleya Îmraliyî ra  derbaz kena coka ganî tecrîd bêro wedaritene.

Denîzlî û Mersîn de zî serkêşîya cinîyan de Darbeya Qeyûman ameye protestokerdene.