Endama Komelê Cinîyan ê Azadan ê Rojhelatî (KJAR) Werîşe Mûradî ya ke Zîdanê Evîne yê Îranî de yena tepiştene cezaya îdamî dîyaye ci. Endamanê Meclîsê Dayîkanê Haştîye yê Amedî vera qerarê îdamî nêrazîbîyayîş mojna.

Dayîkê ke qezaya Rezanî de verê banê xo de ameyî têhet vera qerarê cezaya îdamî hêrsê xo ard ziwan. Bi nameyê dayîkan Murvete Demir qisey kerd. Demire vat: ''Ma veng danê dewleta Îranî; hinî cezaya îdamê mede cinîyan û camêrdan. Ma sey dayîkanê haştîye vera nê qerarî yê. Ma tîya ra veng danê dewletanê mîyanneteweyîyî; wa îdamî werte ra wedarê. Cinî cuye ya, wa cuye qetil mekerê. Ma înan şermezar kenê û merdimîye rê dewet kenê.''

Demîre vera qeyûman zî hêrsê xo ard ziwan û vat: ''Ma do wayîrê îradeyê xo bivejîyê. Wa memleketê ma ra vejîyê, şirê. Ma şaredarîyê xo bi îradeyê xo fînayî dest.''

Çalakîye bi slogananê “Jin, jiyan, azadî”, “Jin jiyane, jiyane qetil nekin”, “Em îdamê naxwazin” qedîyaye.