Dewleta tirke dima ke Serêkanîyê îşxal kerde tay dewê Til Temirî zî îşxal kerdî. Dewleta tirke nê dewan dana bombayan ver û tede sûcanê şerî kena. Bi hezaran roniştoxî zî hêrişanê dewleta tirke de neçare mendî ke dewanê xo biteriknê.

Dewa Ûm El Xêrî ya Til Temirî de dayîke Fatimaya 70 serre ra berî kesêk nêmend. Dayîke Fatima rixmê bombarduman û hêrişanê dewleta tirke zî dewa xo nêteriknena û keyeyê xo de manena. Dayîke Fatima bi sereyê xo vera îşxalê dewleta tirke xo ver dana û ana ziwan ke a do qet keye û dewa xo nêterikna. Bombardumananê dewleta tirke de odayê keyeyê Dayîke Fatima rijîyayî û texrîb bîyî. Keyeyê ci ra têna odayêke mende.

Dayîke Fatma vana: ''Ge ge ez bombardumanê dewleta tirke ra nêeşkena ra bikewa. La reyna zî ez do dewa xo nêterikna.'' 

Dayîke Fatima visnena vîrî ke cerganê OSO serra 2013î de dewa Ûm El Xêrî de 22 ciwanî bi hawayêkê barbarî qetil kerdî. Dayîke Fatima vana: ''Ma tersenê ke ê reyna heman zulmî bikerê. O çax înan ciwanî qetil kerdî, keyeyî rijnayî.  Nika zî dewleta tirke heman çî kena.  Dewleta tirke dewa ma dana bombayan ver, ma rê gef wanena û bizanê ma diznena. Ma wazenê ke hînî çew nê zulmê înan vindarno.''