Deweka Gulî ya dewa Cafranî ya Çewlîgî de Dayîke Fezîle heywananê xo çêrnena. Dayîke Fezîle vana ke beno ke a 100 serre ya, tam nêno vîrê ci. Pê şîîra Nebîyê kanîyanijan vana: ''Ez gêraya pêro dinya/ Aqil nêmend, menda sewda.''

Dayîke Fezîle qala hîkayeya Nebîyê kanîyanijan kena. Dengbêj Nebîyê kanîyanijî rê xeylê domanê lajî benê la înan ra tek zî nêciwîyeno. Nebîyo kanîyanij zî pê nê dejî serê sibayî ra heta şanî gêreno û kilaman vano. 

Dayîke Fezîle rê zî 8 kêna û 4 lajî benê. Yew kênaya ci dinyaya xo bedilnena, lajê ci Alî ra berî pêro domanê ci yê bînî zî şinê xurbet. Dayîke Fezîle zî dewe de hetê lajê xo Alî de manena.

Dayîke Fezîla vana ke hînî a zî visîyaya. Veyva ci û torna ci şinê verê bizan a zî şina verê kidikan. Wexto ke ma persenê vanê ''Lajê to Alî ça de yo?'' Dayîke Fezîle pê vengêkê dejênî vana ''Meperse, ho peyê kilîdan de yo.''

Lajê ci Alî seba ke nan û werda dayo gerîlayanê PKKyî gerreyê ci yeno kerdene. Zimistan zî leşkerî yenê dormeyê keyeyî gênê û Alî benê Zîndanê Xarpêtî. Dayîke Fezîle ax û wax kena û vana ''Êyê ke bîyî sebebê ci wa keyeyê înan bivêşo.''

Dayîke Fezîle pare kena ke lajê ci verê cû felç bibi û rewşa weşîye ya ey hol nîya û 3 serran ra nata zîndan de yo. Dayîke Fezîle vana: ''Rîyê vîrusê Korona ra ma nêeşkenê şorê ey bivînê. Ma telefon de qisey kenê tim vano dew û keye zaf keweno vîrê ci. Kam wazeno keyeyê xo ra dûrî bimano.''

Persê çira lajê ci qanûnê înfazî ra îstîfade nêkerdo, dayîke Fezîle zî wina cewab kena: ''A efû seba nînan nêvejîyena ke.''

Dayîke Fezleke wina qala ci kena ke lajê ci zimistan de senî hetê notir û leşkeran ra ame berdene: ''Kêna û tornê Alîyî seba ke zimistan de rayîrî qefilîyenê yenê Çewlîg ke Alî bivînê. Ma ê keyeyê xo de pîya nan werdêne. Dima nişka ra tayan vat 'leşkerî ameyê.' Werd wina serê sifra de mend. Leşkeran vat ê ameyê ke Alî berê. Axir înan Alî berd û şîyê.''