Hîlale Hesene (40)  dewa Recîm El Fenûşî ya şaristanekê Til Berakî yê Kantonê Qamişlo de ciwîyena. Hesena ke viraştişê tenûran dadîya xo ra musaye keyeyê xo û cîrananê xo reyde pîya roje de 7-9 tenûran virazena û pê rotişê nê tenûran debarê xo kena.

Hîlale Hesene viraştişê tenûrî wina pênas kena: "Ma Herre, awe, simer û purtî pîya elawenê û ma nê xercî di roj verdenê. Dimayê di rojan ma xerc newe ra elawenê û ma hêdî-hêdî suretê tenûrî danê ci." Hîlale û keyneyê ci seba ke germîya hamnanî de xerc lez wuşk beno, naye ra îstîfade kenî û roje de 7-9 tenûran virazenî. Şarê herêmê mabênê aşmanê hamnan û zimistanî de pê viraştiş û rotişê tenûran debarê xo keno.