Ayşe Şewaqî yan zî Ayşe Erele domanîya xo ra nata peyê xeyalanê xo de şîya û peynîye de resaya înan. Sey cinîyanê bînan vernîya Ayşe Şewaqîye de zî zextê komelkîyî sey astengî vindetî. Aye yew bi yew astengîyî derbaz kerdê û muzîk viraşto.
Şewaqî dewa Bulgurtepe ya Pêrtagî ya Dêrsimî de ameya dinya û doman û ciwanîya aye tîya de derbaz bîyî.
Şewaqîye va ‘domanîya mi de cinitişê tembûrî yê cinîye eyb û gune ameyêne dîyayene’ û wina domnaye: “Pîyê mi Xarpêt ra mi rê tembûrêk ard. O wext ra dima tembûr bibi embazê mi û ez tembûrê xo reyde rakewtêne. Seba ke mi tembûr cinitêne, ti kesî kênaya xo nêerşawitêne hetê mi. Eke cewherê dengbêjîye de vatiş estbo, no aydê ma hemînan o. Raştîya xo de dengbêjîye aydê cinîyan a. Zaf zextî mi ser o estbî, labelê ez rayîrê xo ra nêagêraya.”
Şewaqîye va ‘eşîra mi qet wayîrê mi nêvejîya û tewr zaf no mi dejneno’ û wina dewam kerd: “Badê ke ez ameya şinasnayene, nika zî pesnê mi danî. No het de tewr zaf elewîyan destek dayêne mi. O wext derhêner Hakan Adayî bi nameyê ‘Aşiqê Şarî yê Dêrsimî’ de belgefîlmêk antêne. Aday ame dewa ma û keyeyê ma de bi meyman. Ma sohbet kerd û dima ra bi hawayê nimitkîyî dîmenê mi antî. Cok ra dîmenê zaf tebîîyî vejîyayî raşte. Dima ra Adayî belgefîlm nîşan da û cuya mi bedilîyaye. Adayî mi rê CDyêk ard û dima ra ewnîyayîşê dewij û eşîra mi bedilîya. Labelê werekna înan verê cû destek bidayêne mi.”
