Endamê Komîteya Merkezî ya PKK’yî Hemrîn Dersîme vat amancê dewleta Tirkî tena îşxalkardişê Rojawanî nê îşxalkerdişê heme Kurdistanî yo, la yewbîyayîşê şaranê Rojawan û Vakurê Sûrîye do plananê îşxalî yê dewleta Tirkî pûç vejo.

Hêzo Tewr Gird Hêzê Şarî yo

Dersîmî sere de Roşanê Ganîbîyayîşî yê 15’ê Tebaxe pîroz kerd, şehîdî yad kerdî û nê vatî: ''Ma timûtim vanê şerê dinya yê 3’ine de Kurdî û hêzê Kurdan rolo gird kay kenê û eşkenê rolêkê stratejîk bigêrê xo ser. Coka ewro Rojawan xover dano. Dewleta Tirkî ya paştgêrê DAÎŞ’î ewro vera Rojawanî hêrişê îşxalî rayra bena. Dewleta Tirkî heme leteyanê Kurdistanî de bi behaneyê PKK’yî hêriş kena. Waştişê înan îşxalkerdişê Kurdistanî yo. Vera naye şarê do destkewteyanê Rojawanî bipawo. Dewleta Tirkî çend hêriş kena wa bikero do çîyêk dest mefînê. Na babete de paştîya ma şarê ma ra pît a. Eke ê yew bî û pîya tê bigêrê nê polîtîkayê îşxalî do pûç bêrê vetene. Ma ganî testûr medo ke rewşa Efrînî reyna bibo. Rayber Apo zî tim ano ziwan hêzo tewr gird hêzê şarî yo. Eke şarê ma hêzê xo ra bawerîye bikero, qet kes nêeşkeno vera înan de vindero. No zî bi yewbîyayîş û rêxistinbîyayîşî, xeta Rayber Apoyî de mucadelekerdişî beno. Şarê ma bi bedelanê girdan heta ewro ame. Destkewteyê ke bi gonîya bi hezaran şehîdan ameyî destfînayene, ganî bêrê pawitene û do şarê ma naye bikero.''

Şarê Rojawanî Do Hêrişanê Îşxalî Pûç Vejo

Dersîme wina dewam kerd: ''Roja ma de herra xo pawitiş û azadîye destfînayîş rehet nêyo. Bi bedelanê girdan benê. Xora ma zî nê bedelan danê. Bedelê tewr zafî na babete de  şarê ma dayî. Ma bawer kenê ke xoverdayîşê şaran ê Rojawanî hêrişê dewleta Tirkî pûç bivejo. Şarê ma çar leteyanê Kurdistanî de xoverdayîşêko gird dano. Rayber Apo Îmrali de xoverdayîşêko tarîxî dano. Gerîlayê ma vera îşxalkaran xoverdayîşo destankî rayra beno. Bi nê xoverdayîşî do hêrişê dişmenî bêrê şiktene û îşxal bêro qedînayene.  Rayber Apo vano ke eke ma mezg, zerrî û ruhê xo yew bikerê qet hêzêk nêeşkeno vera ma ser bikewo.Coka ganî ma sey şarî çar leteyanê Kurdistanî de  mezg, zerrî û ruhê xo bikero yew.'2

Dem Demê Yewbîyayîş û Xoverdayîşî Yo

Dersîme qiseykerdişê xo bi nê vatişan qedîna: ''Senî ke vera çeteyan şarê ma bi yew û Kobanê kerdê azad ganî ewro zî bi eynî metodî eynî netîce bêro girewtene. Dem demê yewbîyayîş û xoverdayîşî yo. Ganî her helê cuya goreyê naye bêro organîzekerdene. Şarê Rojawanî ganî sey şarê Fîlîstînî xover bido û hêrişê îşxalî yê dewleta Tirkî bişikno. Xora her tim mîyanê xoverdayîşî de yê. Nika ganî xoverdayîş bêro xurtkerdene. Dem demê xoverdayîşî yo û demê mucadeleyî yo, dem demê ver bi azadîye şîyayîşî yo.''