Şerwanê YPJyî Azadî û Pelşîne serra 2013î de beşdarê YPJyî bîyî. Waya bi nameyê Azadî Tolhildan qala tewrbîyayîşê înan kerde: ''Ez serra 2013î de tewra şorişî bîye. O wext YPJ hema awan nêbi. La bi hawayêkê fermî amebi îlankerdene. Ez û waya xo zî ma serra 2013î de tewrê YPJyî bîyî.

Ma her tim cephe de bîyî. Wextêk zî ez, hîrê xalê mi, lajê xalê mi, waya mi, di birayê mi û kênaya xala mi ma pîya cephe de bîyî. Ma cephe de vîrameyîşê rindî ardî pêser. Nêzdîbîyayîşê ma yê bi merdiman weş bîyî. Ma bi şorişî embazan reyde têkilîya xo xurtêr kerde.

Ma bi fikr û felsefeya Rayber Apoyî xo awan kenê. Ma sayê fikrê Rayber Apoyî, cinîya azade kam a nas kerde Ma sayê embazanê şehîdan bîyî wayîrê taburêkî û alaya xosere. YPJ nika pêro dinya de bi rayberê cinîyan. Ma zî naye ra vanê şorişê cinîyan mîyanê şorişî de yeno awankerdene. No zî sayê fikr û felsefeya Rayber Apoyî bi. Seba ke ma layîqê ci bibê ma do heta peynî têkoşînê xo dewam bikerê.''

Waya bi nameye Pelşîne vat: ''Seba ke ez waya xo reyde rayîrê azadîye de têkoşîn kena zaf keyfweş a. Cuya ma de awankerdişê embazîyêka rastikêne wayîrê manayêka pîle yo. Ma zî seba ke xo biresnê na rastîye têkoşîn kenê. Ma zî sey embazanê xo seba welatê xo şer kenê.''