Hemşaredara Şaristanê Pîlî yê Wanî Bedîa Ozgokçe Ertana ke beşdarê Fûarê Kitaban ê 7'in ê Amedî bîye derheqê polîtîkayê qeyûm ê rejîmê AKP-MHP'yî de qisey kerd.

Ertane ard ziwane ke polîtîkayê zereyî û teberî yê îdareyê sîyasî rijîyayê û hînî nêeşkenê welat îdare bikê.  Ertane bitaybetî qalê wextê Rewşa Îstîsnayî  û heqanê merdimanê ke yenê destsernayene kerd û va: "Şaranê Tirkîya heta nika dewrêk de hendek zerar nêdî. Bi taybetî çend serran ra nata sere de binpaykedişê heqan ê cuye, pêro waştişê sîyaset û şarê Kurdî bi teda yenê binpaykerdene. Oyo ke 19'ê Temmuze de ame kerdene qanûnkerdişê qerarname yê Rewşa Îstîsnayî yo. Qeweto ke verba Qanûnê Bingeyênî  bi hewayêkê xirabî xebitîyeno bi nê şeklî heqê weçînayîşî destê Kurdî ra girewt.

Şarê Kurdî Zulmî Qebul Nêkeno 

Heqê xoîdarekerdişî yê şarî ame binpaykerdene. Xora şarê Kurdî nê zulmî qebul nêkeno vera neheqîye xover dano. Êyê ke şexsê ma de rastikên bî, wijdanê weçînayîşî, amayoxê înan, waştişê înan ê îdareyî yê. Şarê ma 31'ê Adare de bi şîara 'ma qeyûm nêwazenê' şîyê raydayîş û şarê ma verba hendek propagandayanê reşan, destbendkerdişanê wekîlan û krîmînalîzekerdişan vat 'Ma nê merdiman weçînenê.' Na babetêka zaf girîng a. Aye ra oyo ke hukmat nika keno verba şexsê ma nîyo, verba îradeyê şarî yo. Wan de 3 serran ra zêdêr o rewşa îstîsnayî, astengî û dormegirewtişî esta. Nê pê qerarê walîyî û pê meneya 'asayîşî' yenê kerdene. Yanî nika Wan de rewşa îstîsnayî esta. Aye ra şaristan de çalakîyî, eşkerayîyê çapemenîye, nawnayîşî  qedexe yê. La nê pêroyî têna seba tayê beşan ê komelî qedexe yê. La reyna zî şar ma reyde yo."