Endama Koordînasyonê KJKyî Besê Erzîncan hetê komelkî ra serra 2019î û hedefê 2020î  ANFyî rê ercnayî.

Ercnayîşê Erzîncane wina yê:

2019 de bi ruhê xıoverdayîşî grevê vêşanîye ameyî kerdene û netîce de Rayberê ma reyde pêvînayîşî ameyî kerdene. Rayberê ma 7 madeyî amede kerdbî ke zaf girîng bîyî. Rayberê ma tewirêko tarîxî girewt xo ser. La dewleta tirke nê madeyî û tewirî nêercnayî.Polîtîkaya îşxalî hem zere de hem zî teber de dewam kerd. Vakurê Kurdîstanî de têna şaredarîyî nêameyî xespkerdene yan zî îşxalkerdene. Dewleta tirke vera kurdan, cinîyan kultur û ziwanê kurdan polîtîkaya dişmenîye xebitnaye.

Serra 2019î de cinîyanê Vakurê Kurdîstanî de bîyî kerdoxê xoverdayîşî. Cinîyan keyeyan de, dezgehan de meydanan de her cayê cuye de têkoşîn û xoverdayîşê xo dewam kerd. Coka yeno famkerdene ke çira cinîyî, sîstemê hemserekîye yenê hedefkerdene. Wazenê hem têkoşînê şarê ma hem zî têkoşînê cinîyan biqedê la cinî û şarê ma hînî her çi zanenê. Bi nê hawayî ma serra 2019î de dî ke cinîyê ma û şarê ma wayîrê xoverdayîşêkê pîlî û tewirêkê rûmetînî bîyî.

Tecrîdê Rayberê ma ra ê do nêeşkê netîceyêk bigêrê. PKK de ronayîşê ci ra nata raştîya Rayberîye esta. Naye ra xebatê ma yê seba azadîya Rayberê ma û cinîyan do dewam bikê.

Ganî ma tesîranê Xoverdayîşê Rojawanî baş biercnê. Bi nê xoverdayîşî yewîya neteweyîye ya kurdan, yewîya şaranê Rojhelatê Mîyanênî berz bîyî. Cinîyê Rojhelatê Mîyanênî nê prosesî de paştdayoxê tewr pîlî bîyî. Rojawan de awankerdişê meclîsê cinîyan zî mîsalê ney o. Sîstemê cinîyan ê Rojawanî 2019î de xebatê xo yê awankerdişî kerdî xurtêr. Xopawitiş de, ekonomî de, sîyaset de, kultur de û dîplomas de aver şîyî.2020î de Rojawan de xoverdayîşê şaran do dewam biko. Kurdî do nê erdî ser o heqê xo bigêrê.

2020î de dewleta tirke hêrişê xo yê vera cinîyan do dewam bika. Vera îqtîdarê faşîstî yê AKP-MHPyî ma do xo ver bidê.Ma do cuya têduştîye awan bikê. înşayê cinîye-camêrdî newe ra rojdemê ma de yo. Nê esasî ser o sere de cinîyî, pêro şarî, bawerîyî wa tewrê gerîlayan bibê. Wa tewrê waranê ma yê xebatî bibê.

2020î de ke do serra azadîya cinîye biba ma do bi qerardarîye û israrî têkoşînê xo dewam bikê. Ma do seserra 21. bikê seserra azadîya cinîyan. Ma do têkoşînê azadîye yê cinîyan her ca de vila bikê û bi demokrasî û hêzanê azadîye nê têkoşîn berz bikê; ma ganî ser bikewê.Çend zor zî bibo sey cinîyan ma kewenê serrêka newîye ke îhtîmalê serkewtişê ma pîl o. Serra 2020î pêro şarê ma rê, cinîyan rê, elewîyan rê, bawerîyan rê, hêzanê demokrasî û azadîye rê fîraz bo.Bi cinîya azade cuye do biba rind û do bi hawayêkê rûmetîn bêra ciwîyayene."