Çarçeweya Hemleya ya ke bi şîarê ‘‘Ma bîyî yewe û ser kewtî, ma do bi xoverdayîş bipawê‘‘ hetê cînîyan ê Reqa, Tebqa, Dêrazor û Minbîcî ra ameye destpêkerdene de herême de raya verêne êşîranê Ereban komxebata cinîyan viraşte.
Êşîranê Ereban raya verêne Tebqa de komxebata cinîyan viraşte. Komxebata ke temsîlkarê cinîyan ê eşîranê Eraban ameyî têhet, Reqa, Tebqa, Dêrazor û Minbic ra cinîyê temsîkarî tewrê ci bîyî.
Temsîlkarê cinîyanê Reqa ra Meryem Îbrahîm a ke komxebate de qisey kerd vist vîrî ke na komxebata verêne ya cinîyan ê Ereban a û ard ziwan ke cinîyê herême dinya rê bîyî nimûne.
Henaa Derde ya ke bi nameyê Tirkmenan qisey kerd bale ante cuya hempare ser û va: ‘‘Ma ramojna heme dinya ke ma cimato azad û demokratîk wazenê. Ê ke wazenê destkewteyanê ma çîn bikerê, ma do xeta şehîdanê xo de bi xoverdayîş cewabê înan bidê.‘‘
Bi nameyê cinîyan ê Çerkezan Zahîde Îhaqe zî nê vatî: ‘‘ Cinîyanê ke dejê tewr girdî antî, îradeyê xo kerd werte. Yewbîyayîş û heskerdişê ma îspatê serkewtişê şorişê ma yo.‘‘
Hele Hesenê ke bi nameyê cinîyan ê Kurdan qisey kerd komxebatê sey cewabê xoverdayîşî yê vera tehdît û hêrişanê Tirkîya hesibna û va: ‘‘Ma cinîyî vera îşxalê herême yê û ma do xoverdayîşî ser bikewê.‘‘
Dimayê qiseykerdişan beyannameyê komxebate ame eşkerakerdene. Bayannameyî ra tayî cayî wina yê:
*Ganî cimatê mîyanneteweyîyî vera îşxal û binpaykerdişê heqanî yê dewleta Tirkî yê vera Efrîn, Bab, Ezaz û Cerablusî bêveng memano.
* Hêzê leşkerî yê ke binê serbanê Îdareyê Xoserî yê Rojakewtene û Vakurê Sûrîye de yê, ganî fermî bêrê naskerdene.
* Seba muhakemekerdişê çeteyanê DAÎŞ’î yê ke Rojakewten û Vakurê Sûrîye de tepişteyê, ganî herême de mehkemeyê mîyanneteweyîyî bêrê ronayene.
* Têgêrayîş û rêxistin cinîyan ê Dinya ganî paştî bidê mucadeleyê cinîyan ê Rojakewten û Vakurê Sûrîye.
*Ganî hêzê demokratîkî yê dinya vera hêrişanê îşxalî yê dewleta Tirkî yê vera Rojakewten û Vakurê Sûrîye tewiro zelal ranojnê.
* Semedê çareserîya krîzê Sûrîye, ganî xarîtayê rayîrî de rolê cinîyan vernî de bêro tepiştene.
