Bi wesîleya 8’ê Adare Roja Cinîyan a Mîyanneteweyîye Ewropa de cinîyî bi reng û vengê xo vejîyayî meydanan vera hêrişê camêrd-dewlete hêrsê xo ard ziwan û mesahê xoverdayîşî dayî.

STRASBOÛRG

Strasboûrg de 8’ê Adare Roja Cinîyan a Mîyanneteweyîye bi pêresayîşê cinîyan rayraşîyayîşêk ame kerdene û cinîyan pankarta Leyla Guvene kirişte û slogana ‘Jin, Jiyan, Azadî’ eşte. Bajarê Strasbourgî yê Fransa de bi paştîdayîşê şaredarîya bajarî û organîzekerdişê bi desan sazîyanê cinîyan rayraşîyayîşêk ame kerdene û rayraşîyayîş Gara Trêne ya Merkezî ra dest pêkerd. Rayraşîyayîşî de bêmabên slogana ‘Jin, Jiyan, Azadî’ ameye qîrayene.

TOÛLOÛSE

Bajarê Toûloûse yê Fransa de zî 8’ê Adarê bi coş ame pîrozkerdene. Çalakîyan de derheqê halê grevan de vilawekî ameyî vilakerdene û mîtîngek ame viraştene.

GRAZ

Bajarê Grazî yê Awusturya de zî organîzasyonanê cinîyan, partîyanê sîyasîyan û cinîyan ê aktîvîstan 8’ê Adare bi rayraşîyayîşêk pîroz kerd. Rayraşîyayîş bi tewrbîyayîşê bi seyan cinîyan saet 16:30 de Sudtîrolerplatze ra dest pêkerd. Çalakîye de serê nameyê NCKD’yî yê Grazî qiseykerdişî ameyî kerdene û bale ancîyaye serê serê xoverdayîşê grevan.

BRAÛNSCHWEIG

Bi organîzekerdişê sazîyan ê cîyayan ê cinîyan 8’ê Adare bajarê Braûnschweigî yê Almanya de zî bi rayraşîyayîş û mîtîngêk ame pîrozkerdene. Mîtîng de serê nameyê Komuna Şehîd Zozan Cûdî de Şeha Ekîncî qisey kerd û bale ante serê mana û muhîmîya 8’ê Adare.

MÎLANO

Bajarê Mîlano yê Îtalya de zî bi tewrbîyayîşê seyan cinîyan rayraşîyayîşêk ame kerdene. Rayraşîyayîş de endamanê Komîteya Kurd û Rete Cinî zî hadre bî. Qiseykerdişanê xo serê nameyê temsîlkarîya Rete Cinî de ameyî kerdene de bale ancîyaye serê Leyla Guvene ke seba şikitişê tecrîdê serê Ocalanî grevê vêşanîye de ya. Rayraşîyayîş bi slogan ‘Jin, Jiyan, Azadî’ qedîya.

KOPENHAG

Kopenhagê Danîmarka de zî 8’ê Adare bi rayraşîyayîş û mîtîngêk ame pîrozkerdene. Rayraşîyayîşo ke hetê Meclîsê Cinîyan ê Sêvê û Agîta ra ame organîzekerdene Kongens Nytorvî ra dest pêkerd. Rayraşîyayîşo ke nêzdîyê 2 hezar kesî tewrê ci bîyî de slogan sey ‘Jin, Jiyan, Azadî’, ‘Bijî Leyla’ ameyî eştene. Qiseykerdişo ke serê nameyê Meclîsê Cinîyan ê Sêvê ra ame kerdene de bale ancîyaye serê grevanê vêşanîye yê ke bi serkêşîya Leyla Guvene dest pêkerdîbî.

KOLN

Vengdayîşê Platformê Grevî yê Cinîyan ser o 8’ê Adare Koln de bi rayraşîyayîşêk ame viraştene. Rayraşîyayîşo ke temsîlkarê Femînîstî, Alman, Kurd, Îranijî û Tirkîyayijî, Lezbîyenî, Homoseksuelî û partîyanê sîyasîyan zî tewrê ci bîyî de nêzdîyê 4 hezar kesî hadre bîyî. Rayraşîyayîşî Bahnhofvorplatze ra dest pêkerd. Tîya temsîlkaranê Meclîsê Cinîyan ê Vîyane yê Kolnî Berfîn Amade qisey kerd û ard ziwan ke xoverdayîşo ke serra 2018’î de ame kerdene netîceyê rindî xo reyde ardî. Cinîyî heta Heûmarkî rayra şîyî û tîya zî mîtîngêk viraşt.   

HÎLDESHEÎM

Bajarê Hîldesheîmî yê Almanya de zî rayraşîyayîşê 8’ê Adare hetê cinîyan ê femînîstan ra ame viraştene. Rayraşîyayîşî HBF’yî ra dest pêkerd û sloganê sey ‘Jin, Jiyan, Azadî’ û ‘Bijî YPG’ erzîyayî. Cinîyê ke vernîya Meydanê Şaredarîye de ameyî pêser seba şehîdanê Rojawanî yê ke hemverê DAÎŞ’î de şer kerdibi deqeyêk rêz girewt. Çalakîye dima ra bi sloganan qedîyaye.

ATÎNA

Paytextê Yunanistanî Atîna de zî cinîyan 8’ê Adare bi rayraşîyayîşêk pîroz kerd. Rayraşîyayîşo ke Meydanê Sîntagma ra dest pêkerd û bi sloganan heta Meydanê Akademia dewam kerd. Rayraşîyayîş de cinîyan bêmabên slogana ‘Jin, Jiyan, Azadî’ eşte.