Ewropa de aktîvîteyê 8’ê Adare dewam kenê

Aktîvîteyê 8’ê Adere Roja Cînîyan a Mîyanneteweyîye bi coşêkê girdî dewam kenê. Cinîyî xoverdayîşê Leyla Guvene silam kenê û bale ancenê xoverdayîşê grevê vêşanîye ser.

Bajaranê Hollanda Den Haag, Arnhem, bajaranê Awusturya Innsbruck,Vîyana, bajaranê Almanya Duîsburg, Monchengladbach û Grevenbroîch, Munîh de bi wesîlaya 8’ê Adare aktîvîteyê cîya-cîyayî ameyî organîzekerdene.

DEN HAAG

Bajarê Hollanda Den Haag de bi şerkêşîya TJK-E’yî aktîvîteya 8’ê Adare ameye organîzekerdene. Encumena Şaredarîya Den Haagî Fatîma Faîte û xoverdayoxê grevê vêşanîye Huseyîn Yildiz û Hasbî Çakici beşdarê aktîvîteye bîyî. Hasbî Çakici yê xoverdayoxê grevê vşanîye şiîrê xo wendî û Huseyîn Yildizî zî qiseykerdişêk kerd. Yew tîyatroyo ke seba xoverdayîşê Leyla Guvene amebi amadekerdene zî vejîya şarî ver.

ARNHEM

Bajarê Hollanda Arnhem de, bi serkêşîya Meclîsê Cinîyan ê Fatoş Saglamgoze yew panel ame organîzekerdene. Parlamentera HDP’yî ya verêne Çîlem Kuçukkeleşe û endama Meclîsê Partîye Zarîfe Atîke zî sey qiseykerdoxî beşdarê panelî bîyî. Atîke qiseykerdişê xo de 8’ê Adare pîroz kerd û va ganî cinîyê Kurdîstanî, hîna aktîf mucadele bikê û faşîzmî birijnê. Kuçukkeleşe Atîke ra dima qisey kerd û şexsê Leyla Guvene de 8’ê Adare yê pêroyê cinîyan pîroz kerd.

INNSBRUCK

Paytextê eyaletê Tîtolî yê Awusturya Innsbruck de, derheqê 8’ê Adare de aktîvîte ameye organîzekerdene û bale ancîyaye xoverdayîşanê grevê vêşanîye ser. Aktîvîteye de sazîyê sey Komunê Cinîyan ê Amara, Cinîyê Neweyî, Kolektîfê Mor-Kizilî, ADKH, AABF’yî ca girewt. Bi nameyê Komunê Cinîyan ê Amara Zarîfe Koçgîrîye qisey kerd û qiseykerdişê xo de bale ante xoverdayîşê Leyla Guvene û embazanê aye ser.Aktîvîteye mûzîkî ra dima qedîyaye.

VÎYANA

Paytextê Awusturya Vîyana de zî aktîvîteya 8’ê Adare ameye organîzekerdene. Aktîvîte salona Modlîng Vlkshochschule de saet 14.00 de ameye viraştene. Grubê mûzîkî yê sey Koma Arîn, Koma Medya û ekîbê govende beşdarê aktîvîte bîyî. Nulgun Başaran a ke Strasbourg de 84 rojî yo grevê vêşanîye de ya zî yew peyamo vîdeoyî erşawit aktîvîte. Reyna Sultan Yîgîte û Şivan Agaoglu yo ke 37 rojî yo Vîyana de grevê vêşanîye de yê zî beşdarê aktîvîteye bîyî. Agaogluyî qiseykerdişêk kerd û va ê do heta ke tecrîd bêro şikitene, çalakîyanê xo rê dewam bikerê. Hemsereka KCDK-E’yî Fatoş Goksungure zî aktîvîte de qisey kerd. Goksungure va tecrîdo ke Ocalanî rê yeno kerdene, pêroyê şaran rê yeno kerdene.

MONCHENGLADBACH / GREVENBROÎCH

Bajaranê Almanya Monchengladbach û Grevenbroîchî de zî bi munasebetê 8’ê Adare panelî ameyî organîzekerdene. Parlamentera HDP’yî ya verêne Besîme Konca sey qiseykerdoxe beşdarê panelan bîye û grevê vêşanîye yê Leyla Guvene û xoverdayoxanê bînan ercnayî.  Konca bale ante tecrîdê serê Rayberê Şarê Kurdî Abdullah Ocalanî ser û wina va: “No tecrîdo ke teberê qanûnî de yeno domnayene, ma bi mucadele eşkenê bişiknê. Ma cinîyî wayîrê nê hêzî yê û ma eşkenê.“

DÛÎSBÛRG

Bajarê Duîsburgî de zî yew panel ame viraştene. Panel de xoverdayîşê grevê vêşanîye ameyî silamkerdene û Komîteya Jineolojîyî ra Zîlan Dîyare qisey kerd.Dîyare qiseykerdişê xo de bale ante serkêşîya cinîyan ser û wina va: “DAÎŞ zîrveya serdestîya zîhnîyetê camerdîye bi û Rojawan de bi destê cinîyan ame qedênayene. Dewrêko winasî de Leyla Guvene dest bi grevê vêşanîye kerd. Cinîyî serkêşê mucaledeyî yê vera kapîtalîzmî yê.”

FREÎBURG

Bajarê Almanya Freîburg de, hetê Meclîsê Cinîyan ê Nuda ra, bi munasebetê 8’ê Adare yew şewe ameye organîzekerdene. Merkezê Komelê Kurdan ê Demokratîkî yê Freîburgî zî paştdarîye daye aktîvîte. Aktîvîte de Seher Strane, Serhat Çarnewa û Koma Can Welatî sehne girewt û ekîbê govende Sê Gûlên Azadî zî vejîyayî sehne ser.

MUNÎH

Bajarê Almanya Munîh de zî bi munasebetê 8’ê Adare yew aktîvîte ameye organîzekerdene. Aktîvîte hetê Komunê cinîyan ê Sara ra ameye viraştene û qiseykerdişî ameyî kerdene. Qiseykerdoxan bale ante rewşa xoverdayoxanê grevê vêşanîye û tecrîdê serê Rayberê Şarê Kurdî Abdullah Ocalanî ser û waşt ke şaro Kurd hîna zêde wirzo payan ser û tê bigêro.Aktîvîte de peyamê TJK-E’yî ame wendene û hunermendî Narîn Xane, Taybet Xane vejîyayî sehne ser.