Koordînasyonê KJKyî 9ê temmuze de bi eşekrayîya nuştekîye eşkera kerd ke bi wesîleya serrgêra 3ê Tebexe Qirkerdişê Şingalî û 15ê tebaxe ke Talîbanî îqtîdarê Afganîstanî fîna dest ê do mabênê 3-15ê tebaxe de kampanya bidê domnayene. Kampanya do bi slogana ''Vera hêrişanê camêrdan ê hegemonî ma cayê cinîyan ê Şingal û Afganîstan de yê'' bêro kerdene. Dima ra 31ê temmuze de têgêrayîşanê cinîyan ê Rojawanî eşkera kerd ke semedê paştdayîşê cinîyan ê Şingal û Afganîstanî tewrê na kampanya benê.

Goreyê programê cinîyan pîya bi xeylêk aktîvîteyan do 7ê tebaxe de Reqa de forumê cinîyan bêro organîzkerdene. 8ê adara 1857 de New York de 129 cinîyê kedkarî ameybî vêşnayene. Seba ke bale bêro înan ser antene do 129 cinîyî tewrê formî bibê. Kongra Star, Komelê Cinîyan ê Zenobîya, Meclîsê Cinîyan ê Partîya Ameyoxê Sûrîye, Akademîya Jineolojî, Meclîsê Cinîyan ê Partîya Yewîya Demokratîke (PYD), Yewîya Cinîyan a Êzidîyan, Yewîya Cinîyan a Armenîyan û welatanê Rojhelatê Mîyanênî ra cinîyî do tewrê forumî bibê.

Endama Koordînasyonê Komelê Cinîyan ê Zenobîya Nesrîne Hesen û Endama Tekîlîyan û Îtîfaqê Demokratîkî yê Kongra Starî Pencewine Elî derheqê babete de erjnayîşî kerdî.

Pencewîne Elî ard ziwan ke ê paştî danê hemleya KJKyî û nê vatî: ''Şingal de bi hezaran cinîyî ameyî qetilkerdene, Afganîstan û dinya hema cinîyî yenê qetilkedene. Qetlîam û tecawuz hinî bi hewayêkê sîstematîkî yenê kerdene.  Qirkerdişê Şingalî de dejo tewr giran cinîyan û domanan ant. Hema zî aqibetê xeylêk cinîyan nîno zanayene. Afganîstan de zî eynî çî est o. Bado ke Talîbanî 2021î de Afganîstan fîna dest, vera cinîyan şîdet zêdîya. Cinîyî yenê qetilkerdene, heqê înan destê înan ra yeno girewtene. KJKyî hemle daye destpêkerdene û ma zî paştdayîşê xo eşkera kerd. Reqa paytextê DAÎŞî bi, bi têkoşîn û xoverdayîşê cinîyan ame azadkerdene. Cayo ke merkezê îşkece, tecawuz, qirkerdiş û talanî yê DAÎŞî bi, ewro tede cinîyî yenê têhet û bale ancenê qirkerdişan ser, rolê cinîyan ê cuya azade ser o qale kenê.''

Nesrîne Hesen zî wina vat: ''Ma berpirsîyar ê ke cinîyê Şingalî yê ke hêrişê DAÎŞî de ameyî qetilkedene, înan bîyarê vîrî û êyê ke aqitbetê înan bewlî nîyo, seba înan cigêrayîşan bikerê. Rewşa cinîyan ê Afganîstanî zî xo ra çiman ver de ya. Eke ewro hema cinîyî raştê îşkenceyî yenê, no yeno na mana ke ma têkoşînê ma yê hemparî de kêmî est a. Bi şorişê herême cinîyan mojna ke her warî de serkêşîye kenê. Heme dinya dî ke azadkerdişê nê herêman de rolê cinîyan o gird est o. Coka ma wazenê ke heme cinîyê dinya zînciranê koletîye bişiknê bikewê rayîrê azadîye.''