Merkezê Kulturê Kurdan ê Ahmet Kayayî yê Parisî de yadkerdişê şehîdanê Qirkerdişê Parisî yê Diyînî vizêr serê sibayî ra heta şanî dewam kerd.

Şan saete 18.00 de girseyî qirkerdişê dewleta tirke û bêvengîya dewleta Fransa şermezar kerdî. Çalakîye de sloganê "Şehid namirin" û "Jin, Jiyan, Azadî" ameyî berzkerdene.

Hemsereka CDK-Fyî Xanê Akdogan tîya de qisey kerd û vat: ''Cinîyê ke serkêşê Şorişê Rojawanî yê, tim hetê dewleta tirke ra yenê hedefkerdene. La ma soz danê ke rêçê înan teqîb bikerê. Evîne Goyî vera DAÎŞî şer kerd, Ewropa zî pawite la Ewropa a nêpawite. Ma nê qirkerdişî û bêvengîye şermezar kenê.''

Hemserekê CDK-Fyî Şahîn Polatî vat: ''Ma tim wayîrê mîrasê Evîne vejîyê û statuyê Rojawanî bipawê.''

Nameyê TJK-E ser o Arşeme Ahmed vat: ''Şarê ma rixmê hêrişan zî Şorişê Rojawanî paweno û qetî apey game nêerzeno. Ez venga şarê kurdî dana ke Rojawan Kurdîstan o, Kobanê Kudîstan o.''

Şaredara 10ine ya Parisî Alexandra Cordebard vat: ''Paris erdê kurdan o û do tim wina bibo. La heman wextî de Paris bîyo warê qirkerdişê kurdan. Ma do kurdan bipawê. Wa Dozgerîya Terorî ya Parisî derheqê nê qirkerdişan de têbigêra.''

Nameyê keyeyê Evîne Goyî ser o Zeynepe Kara qisey kerd û vat: ''Paris seba ma dejêko pîl o. Ma do heta nefesê xo yê peyênî edaletî biwazê û têkoşînî rê dewam bikerê.''

Nameyê Partîya Keskan a Fransa ser o Aminata Niakate venga dewleta Fransa da ke wa Qirkerdişanê Parisî roşnî bikera.

Nameyê Partîya Sosyalîste ser o Genvieve Garrigos vat: ''Ma kurdan reyde yê û wazenê ke PKK lîsteya terorî ra bêro vetene.''

Qiseykerdişan ra dima hunermendan Meral Alkan, Nuarin, Farqin û Ozan Marufî deyîrî vatî.