Gebze de polîsan reyna mudaxeleyê merdimanê tepişteyan kerd û destûr nêda ke vernîya zîndanî de berê têhet.

Merdimê tepişteyanê ke domanê înan zîndan de semedê wedartişê tecrîdê serê Rayberê Şarê Kurdî Abdullah Ocalanî grevê vêşanîye de yê 9’ê Nîsane de vernîya Zîndanê Gebze de dest bi grevê vêşanîye kerdbi. Çalakîya keyeyanê tepişteyan roja xo ya 16’ine de ya. Parlamenterê HDP’yî  Tulay Hatimogullari û Ayşe Surucu ya pîya keyeyan waşt ke şirê vernîya zîndanî la polîsan destûr înan  nêda. Polîsan merdimê tepişteyan girewtî binê ablûqa û parlamenterî û keyeyî bi fekkî tacîz kerdî.  Keyeyî do valîyê Kocaelî de pêvînayîş virazî.