Gerîla Rûkene: Xoverdayîş do ser bikewo

Gerîlaya YJA Starî Rûkene bale ante serê bêvengîya dewletanê dinya ya vera grevê vêşanîye û da zanayene ke, hêvîya înan bi kesî çin a, ê do bi hêvî û têkoşînê xo ser bikewê û tecrîdî wedarê.

Gerîlaya YJA Starî ya bi nameyê Rûkene, derheqê xoverdayîşê grevê vêşanîye yê vera tecrîdkerdişê Rayberê Şarê Kurdî Abdullah Ocalanî de qisey kerd û ard ziwan ke, ê dewlete ra çîyêk nêpawenê û da zanayene ke, ê do ser bikewê.

Gerîla Rûkene bale ante serê taybetmendîya têkoşînê azadîye yê Kurdistanî û ard ziwan ke, xoverdayoxê ke bi hawayê fedayî têkoşîn danê heta nika xeylî reyan mîyanê têkoşînê înan de  vejîyayê werte.

Rûkene vat, “Bi taybetî nê wextanê peyênan de zîndanan de hevalê ma seba şiknayîşê tecrîdî canê xo da verê adirî. Seba ke no zîhnîyeto serdest o faşîst bişikîyo her cayê Kurdistanî de înan dest da yewbînan. Ma înan silam kenê û vera înan bi rêzdarî benê çewt.”

Rûkene xoverdayoxê grevê vêşanîye yê Kurdistanî, Zîndanan û teberê welatî silam kerdî û ard ziwan ke, ê xoverdayîşê çalakwanan ra hêz gênê.

Xoverdayîş do ser bikewo, tecrîd do bêro wedaritene

Rûkene da zanayene ke, amancê înan o yo ke xoverdayîşî girdêr bikerê û vat, “Roja ma de beno ke dişmen wina fikirîyeno û wazeno ke bido qebûlkerdene ke xebat û têkoşînê nê hevalan tesîrê şiknayîşê zîhnîyetê faşîstî nêkeno, bi grevê vêşanîye ser nêkeno; labelê tarîx de ameyo dîyene ke bi têkoşînanê winayan hem faşîst û serdestî bin kewtê, hem zî verê rayîrê têgêrayîşê pêroyî yê şaran ameyo akerdene.”

Gerîla Rûkene vat, xoverdayîşê grevê vêşanîye do ser bikewo, tecrîd do bêro wedaritene û vat, “Wa hevalê ma yê zîndanan bizanê ke ma bi her hawayî înan reyde de yê, çi bi çeke çi zî bi xebatanê pêroyîyan. Ma înan teqîb kenê. Ma do pîya têkoşîn bidê û faşîzmî bin bikerê. Hetê bînî ra paştdarîya ke mîyanê şarî de vejîyaya werte do biresa sewîyeya tewr berze. Wexto ke na bîye, faşîzm do bin bikewo. Azadîya Rayber Apoyî o wext do qetî biba.”

Hêvîya ma kesî ra çin a, ma do sîstemê xo bi xo awan bikerê

Gerîla Rûkene bale ante serê bêvengîya dinya ya vera tecrîdî û grevê vêşanîye û vat, “Hêvîya ma ne Yewîya Ewropa ra esta, ne zî dewletanê bînan ra esta. Seba ke ê yê ke nê sîstemî awan kenê ê yê. Sîstemê xo ma eşkenê awan bikerê. Wexto ke ma vanê azadîya Kurdistanî, azadîya merdimîye girêdayîyêparadîgmaya RêberApoyî yê. Ma do sîstemê xo bi xo awan bikerê. Wexto ke ma naye bikerê ê dewletî do bi mecbûrî nê sîstemî qebûl bikerê.”

Rûkene ard ziwan, ê do tu cara têkoşînê xo ra fek ra nêverdê û vat, “Heta ke ma ser bikewê û biresê amancê xo ma do bixebitê. Seba naye zî hêvîya ma gird a.”

Rûkene da zanayene ke têkoşîn û hêvîya înan û ya xoverdayoxanê grevê vêşanîye yew a, gird a û vat, “Her kesê azadperwerî, demokratî û heme beşê cimatî ganî Kurdan reyde bibê, şarê Kurdî reyde têkoşîn bikerê û bivejîyê wareyan. Ganî tu cara bi sîyasetê qilêrin ê şerê taybetî nêxapîyê ke wazenê hêvîya şaran bin bikewa. Ganî her kes têkoşîn bikero û azadîye do qetî biba.”