Ma vengê weşikî yê gerîlayêka cinî ra deyîrî, kilamî goşdarî kerdî. Mukerrem Kemertaş û Musa Erogluyî ra ravêrena bi Aram Tîgranî. Panc serrî yo ke sefanê gerîla de ya, nameyê ci zî Azadî Umut. Gama ez vana çira Azadî Umut, vana “Çunke seba azadîye ganî umîdî qe meqedîyê.”

Dima ra zî dewam kena û vana: “Gerîlatîye cuye ya, seba rûmetî şerkerdiş a. Raywanîyêka ver bi xo ya, resayîşê cewherê xo ya.”

Dimayê terraqeya weşe ra bi vengê xo yê tenikî û nermî deyîra Aram Tîgranî ya ‘Ax Ax Welat’î vana.

CUYA GERÎLAYAN ZÎ HUNER A

Terraqeya ma hîna zaf şer û hunerî ser o ya. Azadî wina dewam kena: “Rayberîya ma ramote ke şer bi heme hawayî yeno kerdene. Cuya gerîla huner a, gerîlayî zî hunermendê westa yê. Ez şerwanêk a la ez do hunerî zî aver berî û wina şerê xo rê dewam bikerî.”

BI RUHÊ MÎLÎTANÎ HUNER

Gerîlaye Azadî ercnayîşanê destê xo yê Rayberê Şarê Kurdî Abdullah Ocalanî yê derheqê kultur û hunerî de yê ramojnena û nê qismî wanena:

“Huner fealîyêtêkê şerî yo, bitaybetî zî seba şarêkê sey ma ke mucadeleyê xelesîya neteweyîye dano. Ma de huner û ruhê mîlîtanî yan zî huner û şer têmîyan de yê. Ganî hunermendê ma tam bi ruhê şerwanêk kayî kay bikerê, deyîran vajê. Ûca de çîyo ke ê temsîl kenê raştîya ma ya şerî ya, dejê ma yê, xoverdayîşê ma yo û bi hawayêkê pêroyî cuya ma ya şorişgêr a. Êyê ke gure gênê milê xo ser helbet ganî fedakarîya ke înan ra yena waştene zî bigîrê milê xo ser.”

Azadî ancî ana vîrî ke huner fealîyeto tewr pîl ê şerî yo û ciwananê kurdan ra wazena ke nê demî de wayîrvejîyayîşê hunerî wayîrvejîyayîşê şorişî û ercanê Kurdistanî yo. Ma zî çend deyîranê bînan Azadîye ra goşdarî kenê û bi hîsanê ke ma de verdayê rayîrê xo rê dewam kenê.