500 kesan ra zêdeyî femînîstî bajarê Biel (Bienne) yê Swîsre de ameyî têhet, seba grevê cinîyan ê 14’ê Hezîrene bi rengêkê fermî vengdayîş kerd. Slogana grevê zî “Hîna zêde hurmet, dem û destmiz” ameye bewlîkerdene.
Goreyê dezgehê çapemenîya RTS’î yê Swîsre yo ke bi ziwanê Franskî weşan keno, femînîstî Biel de ameyî têhet û vera nêtêduştîya cinî û camêrdan îradeyê xo yê têkoşînî ramojna.
Bi seyan cinîyê ke verê grevê 14’ê Hezîrene ameyê têhet, bi 17 madeyan vengdayîşêk kerd. Mabênê nê madeyan de têduştîya destmizê karî ra heta waştişê wedartişê bacî yo ke ameyo madeyanê hîjyenîkan ê cinîyan ser û hîna zaf waştişî estê. Grevê cinîyan ê neteweyî yê Swîsre yo yewin 14'ê Hezîrane 1991 de bi waştişê têduşteye amebi viraştene û nêm mîyonêk ra zêde cinîyî tewrê ci bîbî. Verê cû zî, 24'ê Teşrîna Verêne 1975 de Îzlanda de zî grevêko bi eynî rengî amebi viraştene cinîyan ra se ra 90 beşdarê grevî bibî. Cinîyan 24 saetî dest xebatî ra antibi.
