Qezaya Tûşba ya Wanî de hemşaredarê HDP’yî Yilmaz Berkî û Ayşe Minaze weşçînitiş de ser kewtî. La YSK rîyê Qeranameyê Hukmê Qanûnî ra dest na mazbataya înan ser o û îradeyê şarî rê derbe kerde û namzedê AKP’yî  Salîh Aman sey qeyûmî ûca wezîfedar kerd û mazabata daye ey.

Ewro Tûşba de kombîyayîşo verên ê  meclîsî ame viraştene. Ayşe Mînaza ke sey hemşaredere ameyebî weçînitene û mazabataya ci dest ra ameyebî girewtene û endamê HDP’yî tewrê kombîyayîşî bîyî. Endamanê HDP’yî destê Akmanî nêgirewt û o sey serekî nêhesibna.

Mamosteyê Mi Mazbataya Mi Xesp Kerde

Hema dest rojdemî nêbi ke hemşaredare Ayşe Mînaze semedê qiseykerdişî mikrofon waşt. Akmanî destur nêda. Naye ser a Mînaze wirişt pay û Akmano ke heman wextê mamosteyê aye yo, rê  va, ‘‘Ma şima nêşinasnenî.‘‘

Mînaze dima ra endamê meclîsî silam kerdî û va:‘‘ Her çikas weçînaye nê tayînkerde bi zî mamosteyê mi no ez nêwazena bêhurmetî bikerî. La vera na neheqîye ganî ez çîyêk vajî. Ewro heqê ma ameyî xespkerdene û ma vera nê bêhuqûqîye bêveng nêmanenê.‘‘

Minaze ewnîyayê Akmanî ra û wina va: ‘‘Mamoste Salîh ti mamosteyê mi bi. Ti ma ra vatêne dizdîye xirab a. Dizdîye ra dûr  vindenê. La ewro ti miyanê sîstemî de biyê dizdo gird, xebera to çîn a. Şima îradeyê şarî xesp kerd û no mewkî de roniştî. Şima pê kamê rîyî vejîyenê mîyanê şarî.  Ma çirey şima rê nê vanê serek. Ma şima nas nêkenê. Ma îstîfaya şima pawenê.''

Akmanî mudaxaleyê Mînaze kerd waşt ke qiseykeridşê ci bibirno. Mînaze vat ke ez talebeyê to nîya ez hemşaredara nê şarî ya. Ez ameye weçînitene. Ti ameyî tayînkerdene. Wa her kes cayê xo bizano.