Têgêrayîşê Şorişê Yewbîyayeyî yê Cinîyan (KBDH)  KBDH’yî derheqê grevanê vêşanîye yê ke bi serkêşîya parlamentera HDP’yî Leyla Guvene ameybî destpêkerdene de, eşkerayîyêka nûştekîye weşanaye.

Eşkerayîye de no ame vatene: “Leyla Guvene mîyanê bêvengîye de vengêk bî. Bi nê xoverdayîşê xo û bi grevanê vêşanîye yê ke aye ci rê serkêşîye kerda, xoverdayîşêk awan kerdo. Tarîxîbîyayîşê nê xoverdayîşî tîya yo. Ma rê ramoto ke îrade nêeşkeno bêro şikitene. Bi hezaran şorişgêr û welatperwerî tewrê xoverdayîşî bîyê. Rayîr û metodê xoverdayîşî bîyê zêde û xoverdayîşêko kolektîf bica yeno. Vengê xoverdayîş, edalet û merdimîye heme dinya de gêreno û beno vengêk ke goşê faşîzmî û îqtîdarî keno kerr. Cesaretê nê vengî zî mucadeleyê azadîye yê cinîyan ra yeno.

No silam Komunê Parîsî ra, meterîsanê ke faşîzm rijnayê ra, Zîlan û Berîtanan ra yeno. Cinîyî teber de û zere de hucreyan raşanenê, no silamê înan o ke îradeyê şikitişê tecrîdî vejeno werte. Ganî ma zî nê vengî rê bibê veng, nê xoverdayîşî biresnê serfirazîye. Leyla Guvene zî sey hezaran cinîyan mabênê ravêrteyî û ameyoxî de bîya pirêk.

Ma kamca benê bibê ma do bi veng, hêrs, serewedartiş û anorê xo kuçeyan de bi kemeran, fabrîkayan de bi makîneyan ma do şerê azadîye şên bikerê. Nika wextê azadîye yo. Wext wextê şikitişê tecrîdî û rijnayîşê faşîzmî yo. Şexsê Rayberê Şarê Kurdî Abdullah Ocalanî de şikitişê tecrîdî û seba şênkerdişê mucadeleyê azadîye ya şaranê kedkaran ê Tirkîya, ma cinîyanê şorişgêran ê ke grevê vêşanîye de yê silam kenê.”