Têgêrayîşê Şorişgêrî yê Yewbîyayeyî yê Cinîyan (KBDH) peymana gemarine ya Şingalî ser o eşkerayîyêke daye ke peymane mabênê Hewlêr û Hukmatê Iraqî de 9ê teşrîna verêne de ameye îmzakerdene.

KBDHyî îfade kerd ke terefê peymane wexto ke DAÎŞî hêrişê Şingalî kerd remayî û Şingal hetê gerîlayan û hêzanê YBŞ û YJŞyî ra ame xelisnayene. KBDHyî ard ziwan ke peymane seke vera êzidîyan komplo yo û no komplo hetê DYA, dewleta tirke û PDKyî ra yeno caardene. 

KBDHyî pare kerd ke dewleta tirke ya îşxalkere Rojawanî ra dima çim verda Şingal û wazena reyna planê tasfîyekerdişî bivisna dewre. KBDHyî vat ke PDK zî hemkarîya dewleta tirke kena.

KBDHyî vat: ''Şarê Şingalî seba destkewteyanê xo bedelê giranî dayî. Êyê ke Şingalî ra remayî ewro mudaxeleyê îradeyê Şingalî kenê. Ganî şarê Şingalî ameyoxê xo ser o bi xo biran bido. Ma şerwananê YJŞyî rê selam kenê û ma hetê şarê Şingalî de yê. Êyê ke dest nanê Şingalî ser o înan ra hesab do bêro persayene.''