Meclîsê Cinîyan ê Partîya Demokratîke ya Şaran (HDP) ra Fatma Kiliçaslan ard ziwna ke dewlete Kurdîstan de vera cinîyan ê HDPyîjan stratejîya şerê taybetî şuxulnena

Kiliçaslana ke ANFyî rê qisey kerd bale ante ser ke dewlete vera cinîyan ê HDPyîjan tewirêko cîya rayra beno û vat: ''Dewlete vera cinîyan ê HDPyîjan bitaybetî zî Kurdîstan de stratejîya şerê taybetî şuxulnena. Mergê Îpek Er ma rê zaf çî vano. Musa Orhan serbest yeno muhakemekerdene. No yew nimûneyê şerê taybetî yo. Cînîyî dewro peyên de zaf yenê teqîpkerdene, remnayene û raştê îşkenceyî yenê. Ma bi îradeyê xo rixmê heme zextan semedê amayoxê xo xîret kenê. Ma zanê ke do zextê vera ma zafêr bo la HDP zî çend şino pîlêr beno. Ma sey cinîyî do cuya xo bi destê xo bibedilnê. Ma zîhnîyetê faşîst ê camêrdan rê meydan wanenê. Ma do tim kuçeyan de bê. Zext û operasyonê tersî yê înan ma nêtersnenê. Ma do çirey peyser game meerzê.''