Cinîyî xo amade kenê ke 8ê Adare de bivejîyê meydanan. Hemşaredara verêne ya Amedî Gultene Kişanaka ke serra 2016î ra nata Zîndanê Kocaelî de tepişte ya qala têkoşînê cinîyan ê Tirkîya û Vakurê Kurdîstanî kerde.

Kişanake ard ziwan ke Tirkîya hetê heqanê demokratîkan û azadîyan ra dewirêkê giranî de ya û no metodê îdareyî seba cinîyan hîna zafêr giran û rijnayox o.

Kişanake vat: ''Mezgê îqtîdarî keye de kuçeyan de, kargehan de bi serdestîya camêrdan pirr bi û no mezg hêrişê cinîyan keno.Heta ke na hîşmendîye nêra vurnayene tebdîrêkê polîsî û yan zî cezaya girane seba kişîyayîşê cinîyan do qîm nêbê. ''

Kişanake îfade kerd ke rewşa bitehlûke na ya ke dewlete xîret kena ke xo Peymana Îstanbulî ra tepîya bianca, heqanê qanûnîyan ê cinîyan batal bikera û vat eke na babete de cinîyî û hêzê demokrasîyî têkoşînêkê xurtî nêkerê heqê qanûnîyî do werte ra bêrê wedaritene û maddeya ''têdûştîya cînsîye'' ya Qanûnê Bingeyînî do bikewa rewşêka bitehlûke.

Kişanake seba têgêrayîşê cinîyan vat: ''Têgêrayîşê cinîyan seba ma bi çimeyê moralî û hêzî. Xoverdayîşê cinîyan ê nê dewirî do tarîx de cayê xo bigêro. Eke ma bieşkê pêlêkê newîye yê demokratîkî awan bikerê, netîce do bi asanî bêra girewtene. Ganî têgêrayîşê cinîyan bi rolêkê rayberî wurzê payan ser. Eke cinîyî, ciwanî, kedkarî, xizanî, merdimê ke bawerî û nasnameyanê cîyayan ra yê, hêzê bindestî têkoşînê xo bikerê yew na rewşa xirabe do bêra qedînayene.''

Kişanake seba 8ê Adare no mesaj da: ''Ez 8ê Adare yê cinîyan fîraz kena. Seba ke ma cewab bidê hêrişê vera cinîyan ma bi tilîlîyanê xo, govendanê xo meydanan de bibê û enerjîya têkoşînî pîl bikerê. Wext o wext o ke ma meşaleyanê azadîye û têdûştîye yê 8ê Adare biresnê Newroze û torra haştîye awan bikerê. Bi nameyê cinîyanê ke nêeşkenê teslîm bêrê girewtene ma do meydanan de bibê.''