Koordînasyonê KJKyî beyanatêko nuştekî weşana û pare kerd ke bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan bi hêrsê vera şîdetê camêrdan bi çalakîyê xurtî ameyî kerdene.

Beyanatê KJKyî wina yo:

"Çayê dinya de beno wa bibo ma selam danê pêro cinîyanê ke seba haştîye, edaletî, têdûştîye, azadîye û demokrasîyî vejîyayî meydanan. Cinîyan ê Kurdîstanî, Tirkîya, Rojhelatê Mîyanênî û dinya bi vîr, bawerîye û qerardarîya xo waştişê xo ardî ziwan û yewbîyayîşêko xurt ê cuyêka azade awan kerd. Dewleta Tirke wazena waştişanê cinîyan ê meşrûyan terorîze bika. Bi polîtîkayê qeyûmî hêrişê sîstemê hemserekîye kena. A zî zanena ke no sîstem seba cinîyan destkewte yo. Vera nê hêrişan ganî cinîyê Tirkîya cinîyan ê Kurdîstanî reyde xoverdayîş geş bikê. Eke cinîyî xoverdayîşê xo geş bikê Tirkîya de tacîz, tecawuz, îstîsmarkerdişê domanan, pederşahîye kêm benê. Coka çayê dinya de benê wa bibê ganî cinîyî wurzê payan ser û pîya têbigêrê. Bi şîara 'Ma pêro seba pêroyînan, pêro zî seba yewêke' ma paştdayîşê cinîyan ê unîversalî kenê ke sînoran derbaz bikê û bi hawayêkê yewbîyayeyî xo ver danê. Bi wesîleya 25ê teşrîna peyêne cinîyî seba heqanê cinîyan, seba azadîya cinîyan xîret kenê, çalakîya kenê, nusenê, huner kenê û xo ver danê û çalakîyê înan manadar û ercaye yê. Ma reyna bi taybetî cinîyanê kurdan pêro cinîyan rê selam kenê û seba nînan serkewtişî wazenê. Ma bawer ê ke çalakîyê înan teyna rojêke ney do her roje bi têkoşîn û eşqî dewam bikê."