Koordînasyonê KJKyî ewro derheqê şayîyanê 8ê Adare Roja Cinîyan ê Kedkaran a Dinya de eşkerayîyêka nuştekîye kerde.

Eşkerayîya KJKyî wina ya:

''8ê Adara 2020î her cayê dinya de Kurdîstan de û Ewropa de bi hawayêkê coşî û xoverdayîşî ame fîrazkerdene. Cinîyê kurdî û ê dinya her ca de seba heqanê xo qerîyayî. Bi bingeyê azadîye zilgitan, qerayîş, govend û rayraşîyayîşanê cinîyan ê xoverdayoxan meydanî kerdî pir û kerd ke xoverdayîş bibo pîlêr.  Cinîyî hînî gamanê rêxistinbîyayîşî û çalakîyan bi lezî erzenê. Merdimîye rayberîya têkoşînê azadîye yê cinîyan de bi sloganê 'cuye, cinîye, azadîye' hînî bîye manadar.

Ma selam kenê cinîyanê ke Kurdîstan de û Tirkîya de vera faşîzmî têkoşînê xo yo rûmetên vet meydanan. Ma sere de cinîyanê Riha, Dêrsimî, Colemêrgî, Sîlopî, Amedî, Êlihî, Îstanbulî, Mersînî, Adana û Anqara  selam kenê pêro cinîyanê ke rîxmê tedayan vejîyayî meydanan û waştişê xo yê seba cuya têdûşte ardî ziwan.Goreyê ma îdîaya azadîye û tewirê vera faşîzmê camêrdan ê her cinîya ke beşdara Rayraşîyayîşê Şewe yê Femînîstî bîye zaf manadar ê. Ma zanenê ke hêrişê AKP-MHPyî tewr nêeşkenê nê tekoşîn asteng bikerê. Ma selam kenê xoverdayîşê cinîyan û ma wazenê vajê ke ma tim hetê înan de yê.

Ma bi heskerdişî û rêzî selam kenê pêro tepişteyanê cinîyan. Cinîyî zîndanan de xeta Sakîne Cansiz de vera faşîzmî xoverdayîşêkê pîlî kenê. Îqtîdaro faşîst û tecawuzker ê Erdoganî bi waştişanê cinîyan ê azadîye, têdûştîye, demokrasîyî û xoverdayîşê cinîyan do çin bibo. Xoverdayîşê cinîyan ê 8ê Adara 2020î mojna ke îfadeyê vurnayîşê dinya do bibo 'Cinîye, Cuye, Azadîye.' 8ê Adara 2020î de cinîyan heman wextî de vat ke 'Ma dinya awan kerde û têna ma eşkenê aye azad bikerê, ma payan ser o yê.' 

Rojawanê Kurdîstanî de hêvîya merdiman rayberîya cinîyan de newe ra zîl dana. Şorişê Rojawanî şorişê cinîyan o ke seba awankerdişê neteweyê demokratîkî cinîyî ci rê rayberîye kenê. Ma bi coşê 8ê Adare selam kenê pêro cinîyanê Rojawanî ke ê cepheyan de, şaristanan de xo ver danê, xo rêxistin kenê û seba azadîye têkoşîn kenê.Ma cinîyanê Rojhelat û Başûrê Kurdîstanî zî fîraz kenê ke emser zî tewirê xo 8ê Adare de mojna. Ma 8ê Adare yê şarê ma yê Qendîlî zî fîraz kenê.

Ma selam kenê cinîyanê êzidîyan ke bi çêrî û qerardarîye vera hêrişanê TCyî Şengal de şer kenê. Ma selam kenê hêzanê YBŞ-YJŞyî û dadîyanê ma yê êzidîyan. Ma plananê gemarinan ê dewleta tirke yê seba erdê Ezidxanî bi nefretî şermezar kenê. Nê esasî ser o ma venha pêro cinîyanê kurdan û ê dinya danê ke wayîrê Şengalî bivejîyê.Ma 8ê Adara 2020î bi ruhê xoverdayoxî yê cinîyan, bi ruhê azadîye û bi hawayêkê bêhempayî pêşwazî kerd. 8ê Adare de cinîyan ancî sozê xo yê seba azadîya Rayber Apoyî ard ziwan. Cinîyan vat 'Tecrîdê vera Rayber Apoyî do bêro şiknayene.' Ma do bi şîarê 'Cinîye, Cuye, Azadîye' dewam bikerê ke xo ver bidê, rayîrî ra şorê, azad bibê û cuya azade biafernê.''