Koordînasyonê KJKyî bi wesîleya Newroze ewro eşkerayîyêka nuştekîye daye.

Eşkerayîya KJKyî wina ya:

''Newroza ke roşanê wayûbiratî, haştîye, yewîye ya pêro şaran rê û şarê kurdî rê fîraz biba. Ma sere de yê Rayber Apoyî Newroza pêro cinîyanê xoverdayoxan û têkoşîneran fîraz kenê. Ma sere de Kawayê asinkar, Mazlum Dogan, Zekîyeyan, Bêrîvanan, Ronahîyan, Rahşanan pêro şehîdan yad kenê. Ma soz danê ke ma tewirê înan ê têkoşînerî bikerê rayraşîyayîşanê Newroze.

Şarê kurdî wayîrê kultur û cuya xo yo. Seba ke nînan bipawo bi hezaran serewedaritişî, xoverdayîşî zî kerdî. Rîxmê pêro talanan, îşxalan û qirkerdişan zî  seba ke estbîyayîşê xo bipawo bi înat tewirê xo dewam kerd. Kurdan senî ke Dehaq bin kerd û Rojhelatê Mîyanênî de xo rê warê cuye awan kerd, ewro zî kurdî bi rolê rayberîya xoverdayîşî û tekoşînî Rojhelatê Mîyanênî de vera DAÎŞî û dewleta tirke ya faşîste têkoşînê xo dewam kenê.

Kila verêne ya Têgêrayîşê Azadîye yê Kurdî û ruhê serewedaritişî Newroza Cizîra Botane û Nisêbînî de ameya tavistene. Şarê kurdî bi renganê xo, kilamanê xo û sembolanê xo meydanî kerdî Newroze û serewedaritişê xo yo verên kerd.

Newroze bîye roşanê nê ruhî û şarê kurdî de hîşmendîya hîsgere û kokine arde meydan. Kurdî nêwazenê ke Newroze têna bi xo fîraz bikerê; çunke zanenê ke Newroze roka yewîye ya. Zanenê ke Newroze roja xoverdayîşî, têkoşînî, têgêrayîşî ya. Coka seba kurdan Newroze roşanêko tewr rind a. Bi nê hawayî zî yena wayîrvejîyayene. Newroze, reng, veng û nefesê ma ya. 

Her çiqas emser nêweşîya gane ra Newroze bi hawayêkê girseyî nêna fîrazkerdene zî ganî bi tewiranê cîyayan bêra fîrazkerdene. Ganî kurdî bi meşlayanê xo serê banan de Kawayan, Mazlûman, Zekîyeyan, Rahşanan, Ronahîyan, Bêrîvanan bi ruhê xoverdayîşî pêşwazî bikero. Ganî şima keyeyanê xo çilayanê xo hewna bikerê, bitavisnê, marşan vajê û Newroze bi ruhê xoverdayîşî pêşwazî bikerê. Ma ganî bi komanê qijkekan kuçeyan de bi kilaman, govendanê xo vajê; Newroze Fîraz Ba!'