Koordînasyonê KJKyî bi eşkerayîyêka nuştekîye bale ante rewşa Rayberê Şarê Kurdî Abdullah Ocalanî ser û semedê xurtkerdişê têkoşînî bi taybetî zî seba çalakîyanê 8ê Adare veng da.

Eşkerayîye de nê ameyî parekerdene:

''27ê sibate de dewleta tirkî da pêhesnayene ke Girawa Îmraliyî de şewat vejîyayo. Girawa Îmrali binê asayîşê dewlete yo pîtî de ya.  Eke ûca şewat vejîyayo no hetê dewlete ra bi zanayîş vejîyayo. Çîyê ke Îmrali de qewimîyenê heme polîtîk û plankerde yê. Bi na xebere mesaj yeno dayene ke do vera kurdan qirkerdişê neweyî bêrê kerdene. Bi nê şewatî îmhakerdişê Rayberîya ma yeno hedefkerdene. Wazenê ke bi şîdetî rojdemî bibedilnê û xo bixelisnê.

Şexsê Rayberîya ma  de wazenê ke têkoşînê azadîye yê kurdan çîn bikerê. wazenê ke bi qetlîamanê neweyan  xo bixelisnê la nê qewimîyayîşî şarê ma, cinîyan de hêrsî  û têkoşînî hîna xurt keno. No sîyseto xirabin û polîtîkayê qirkerdişê ke wazenê Rayberîya ma ser ra bêrê rayraberdene pê adirî kaykerdiş o. Dewleta tirke bi polîtîkayanê qirkerdişî do qet çîyêk dest nêfîno. Rewşa Rayberîya ma têna Kurdîstan nê Rojhelatê Mîyanênî û dinya ser o tesîr keno.

Ganî cinîyî heta ke Rayber Apoyî ra xeberêke bêro girewetene tim û tim çalakîyan de bê. Rewşa Rayberîya ma meseleya estbîyayîş û çînbîyayîşê kurdan a. Ganî şarê ma û cinîyî bi hîsdarî nizdê ci bibê.  Ganî Vakur de şarê ma vejîyo kuçeyan û tewirê xo ramojno.  Çîyê ma yo ke ma vînî bikerê nêmendo. Têna bi eşkerayîyanê çapemenîye nêbeno. Tewirê  Vakurê Kurdîstanî do prosesî bewlî bikero. Rojawan, Başûr, Rojhelat, Şengal Ewropa Rûsya û heme cayê ke kurdî tede yê ganî bi çalakîyan tewir bêro ramojnayene. Ganî cinîyê kurdan çalakîyanê 8ê Adare bi rewşa Rayber Apoyî bibestê yewbîyan û bi ruhê azadîye  têkoşînî xurt bikerê. Heta ke keye û avûkatî pêvînayîş nêkirê ganî çalakîyî dewam bikerê. Ma reyna veng danê ke wa kurdî û hêzê demokrasî û azadîye têkoşînî xurt bikerê  û vanê ke bê Rayberîye cuya nêbena.''