Komîteya Îtîfaq û Têkilîyanê Demokratîkan a KJKyî bi wesîleya serrgêra yewine ya qetilkerdişê Jîna Emînî eşkerayîyêke daye û venga pêro kesan da ke tewrê çalakîyanê şorişê 'Jin, Jiyan, Azadî' bibê.

Eşkerayîye wina ya:

''Ma şexê Jîna Emînî û Şilêre Resûlî de şehîdanê şorişê Jin, Jiyan, Azadî bi rêz û minetî yad kenê. Ma sere de xoverdayîşê zîndanî yê cinîyan xoverdayîşê pêro cinîyan ê Îran û Rojhelatê Kurdîstanî selam kenê. 

Raştîya Jin, Jiyan, Azadî ya ke hêverî hetê Rayber Apoyî ra amebî ardene ziwanî, par nê rojan de bibî qîrayîşê azadîye yê cinîyan ê Îranî. Jin, Jiyan, Azadî sozê cinîyan û peymana înan a coka paradîgmaya azadîye ya cinîyan a. Na paradîgma nameyê felsefeya azadîye ya ke cinîyan do koletîye ra bixelisna. Ewro Jin, Jiyan, Azadî bîyo wayîrê karakterêkê globalî. Par dinya nê rojan bîya şahîd ke cinîyî seba şorişî vejîyayî waran.

Cinîyan vera polîtîkayanê dişmenîya cinîyan ê dewleta Îranî sere wedarite, pêro komelî tewrê çalakîyanê xo kerd û bi nê hawayî zî nasnameyê xo yo serkêş îsbat kerd. Rêxistinî, xoverdayîş û têkoşînê cinîyan garantîya pêro heqan û azadîye yo. Waştişê vurîyayîşî û hêrsê ê çalakîyan ewro zî dewam kenê. 

Sey cinîyan waştişê ma û waştişê komelan ê bindestan seyci yê. La çalakîyê cinîyanê Îran û Rojhelatê Kurdîstanî çalakîyanê bînan ra cîya yê. Çunke nê çalakîyan de waştişê azadîye yê cinîyan vurîyayo têkoşînêkê kolektîfî. Ma zanenê ke eke sîstemo kanwaz nêvurîyo her cinîye bena Jîna Emînî. Coka cinîyan laçikê xo eştî, vêşnayî; gijikê xo qesnayî; kuçeyî dekerdî. Cinîyan ard ziwan ke hînî ê nêwazenê bi ferzkerdişî biciwîyê.

Çalakîyanê Jin, Jiyan, Azadî îsbat kerd ke eke dinya de zorbazî yew benê têkoşînê cinîyan zî yew benê. Jîna Emînî hetê eqlê camêrdan ê zorbazî ra kişîyaye. Polîtîkayê dewletan ê vera cinîyan hînî asta wehşetî de yê. Her serre bi hezaran cinîyî yenê qetilkerdene. Welatanê sey Îran, Afganîstan û Tirkîya de cinîyî raştê kerdişanê vera merdimatîye yenê. Dewletê kolonyalîstî Rojawan, Şingal û Vakurê Kurdîstanî de qestî ra cinîyan kenê hedef. Dewleta tirke, dewleta Îranî, Talîban û dewletê bînî vera cinîyan sûcê terorî kenê. Feraseto ke Jîna qetil kerda, nê eqlê camêrdan ra yeno. Coka serewedaritişê cinîyan bênetîce nîyo.

Cinîyî mecbur ê ke nê ferasetî ra hesab bipersê. Şîarê Jin, Jiyan, Azadî îsbat kerd ke cinîyî cayanê cîyayan de heman çî vînenê.Sey cinîyan ganî ma vera nê qirkerdiş û xespkerdişê heqan waştişanê xo bi tewirê têkoşînî yê mendeyî aver berê. Ganî ma vera qetilkerdişê Jînayan dest bidê destî, mil bidê milî û vera sîstemê serdestîya camêrdan hîna bi xurtî biqîrê.

Heta ke şîdet, teda û cînayetê vera cinîyan nêqedê cuye do azad nêba û sîstemî do demokratîk nêbê.

Bi na wesîle ma sere de rejîmê Îranî yê dişmenê cinîyan rê, pêro hêzanê îqtîdaran rê vanê ke têkoşînê cinîyan meşrû û heq o! Seke çalakîyanê peyê 16ê êlule de ame dîyene têkoşînê cinîyan nêno astengkerdene. Ma venga dewleta Îranî danê ke peynîya tedayanê vera cinîyan bîyara, cezayanê vera cinîyan wedarna, şexsê embaza ma Zeynebe Celalîyan de pêro tepişteyanê sîyasîyan vera bida. Hînî pê zorbazîye îdarekerdiş qedîyayo. Pê polîtîkayanê dînperestan netîceyêke nêna destvistene. Seba ke dewleta Îranî krîzanê xo çareser bikera û bivurîya ganî nê serewedaritişî sey firsendî bivîna. Wextê ci ameyo ke dewleta Îranî xo bivurna.

Ma reyna xoverdayîşê Jin, Jiyan, Azadî yê heybetînî selam kenê. Ma venga pêro cinîyan û terefgîranê azadîye û demokrasî danê ke bi hawayêkê aktîfî tewrê çalakîyanê serrgêra yewine ya şorişê Jin, Jiyan, Azadî bibê. Ganî têkoşînê cinîyan bi paştdayîşî bêro pîlkerdene û dewam bikero. Ma venga pêro têgêrayîşanê cinîyan danê ke paştî bidê nê çalakîyan. Ma soz danê ke vera polîtîkayanê serê cinîyan her ca û wextî bi rindîya Jin, Jiyan, Azadî bixemilnê.''