Huseyîn Çig hezaran kesanê ke hemverê tecrîdê Îmraliyî de kewtê grevê vêşanîye ra yew o. Çig Zîndanê Şakranî de yo û 29 serrî yo ke tepişte yo. Çigî 1’ê Adare dest bi grevê vêşanîye kerd. Çig sere de Zîndanê Ceyhanî de mendo dima ra zî zîndananê Elbîstan ê Mûşî, Bayrampaşa, Bolû, Antalya û tewr peynî zî Zîndanê Umranîye rê ameyo sirgûnkerdene. Maya ci Fatma Çige vat ke waştişê domananê înan waştişê merdimîye û yê huqûqî yê û waşt ke seba şinawîyayîşê vengê înan destê kamî ra çi yeno bikero.

‘Sozo ke Dayo Embaz Egîdî Bica Ano’

Keyeyê Çigî rîyê zextanê dewlete ra 90’an de mecbûr mendo ke koçê Edene bikero. Maye Çige derheqê domanê xo de nê vatî; „Huseyîn merdimêko rîhuyaye bi. Hewna ke qic bi 7-8 serrî Embaz Egîd dîbi. Wextêk înan sohbet kerd. A roje ra heta niha soz dayo Embaz Egîdî. Embaz Egîdî lajê mi ra vat, ‚Şore pîyê xo ra vaje se beno wa bibo wa sîlehê dewlete nêgêro û qorucîtîye qebûl nêkero. Wa hemverê şarê xo de nêvejîyo. Ti zî bibe pîl û fek mucadeleyê xo ra vera mede. ‘A roje ra nata bi giranîyêka pîle zereyê mucadeleyî de yo. Wextê qijîya xo de zî tim persî kerdêne, yanî merdimêko persox bi.”

Birayê Ci Şehîd Bîyî

Maye Çige vat a zî sey lajê xo sebebê xebatanê sîyasîyan ra serra 2006 de ameya tepiştene û 4 serrî zîndan de menda û vat, „Ewro bi çi sebebî lajê mi zere de yo înan bi heman sebebî ez zî girewta. Ez 75 serrî ya, domanêk mi Koyê Gabarî de şehîd bi. Domanêkê min o bîn zî Kobanê de şehîd bi. Domanêko bîn zî nika ko de yo. Yew zî nika zîndan de yo û ez zî teber de mucadele kena. Ez bi mîlyonan reyan nê tecrîdî şermezar kena. Êyê ke bîyê sebebê nê zî înan rê zewtan dana. Heta tecrîd nêwedarîyo do huzûr nêro nê welatî. Tena seba Kurdan nê seba Tirkan zî wina yo, eke ê wazenê huzûr bêro Tirkîya ganî tecrîdî wedarê.”

‘Mucadeleyê Şima Bixêr Bo’

Maye Çige verê çend rojan domanê xo dir telefon de qisey kerd, ard ziwan ke lajê aye Huseyîn Çigî aye ra vato, ‘Mayê heta ke tecrîdê serê Ocalanî nêro wedartene ma fek çalakîya xo ra vera nêdanê. Ti meterse, seba ma xemgîn mebe. Tena mucadeleyê xo bidomne.’

Maye Çige peynîya qiseykerdişê xo de vat, “7000 hezarî kesan bedenê xo vêşanîye ser o ronayo. Lajê mi zî înan ra yew o, ez tu ferq nêfînena mabêna înan. Her ciwanê ke zîndan de yê bira, laj û domanê min ê. Ez reyêk zî nêbermaya. Yanî ez maya nê domanan a, bermayîş goreyê ma nêyo. Ez serberz a, o zî do bi mi serberz bo. Mi çend rey telefon de ci ra vat ‘Çalakîya şima bixêr bo.’ Çîyo ke keweno doşê ma ser paştdayîş o û moralê înan berzgirewtiş o.”