Nameyanê sembolan ê xoverdayîşê Fîlîstînî ra Leyla Xalide  hemsereka KCD'yî Leyla Guvena ke seba wedartişê tecrîdê serê Rayberê Şarê Kurdî Abdullah Ocalanî  159 rojî yo girevê vêşanîye yê bêdem-bêagêrayîşî de ya, zîyaret kerde.

Leyla Xalide endamê  TJA Ayşe Gokkane û Gulcîyan Şîmşeke û parlementera HDP’yî ya Amedî  Salîha Aydenîze ke şîyê serdanê Leyla Guvene hetê kênaya Guvene  Sabîha Temîzkane ra ameyî peşwazîkerdene.

Ma  Her Di Leylayî Do Dest Bidê Yewbînan û Ser Bikewê

Guvene  qiseykerdişê xo yê Leyla Xalide de nê vatî: ‘‘Ez zaf keyfweş bîya ke  şima ameyî. Şima sere û çiman  ser o ameyî. Nameyê to tim mucadeleyê azadîye yê Kurdan de bibe. Ez nêeşkena qisey bikerî la wazena naye vajî; ma şarê bibeqî yê Filîstîn û Kurdistanî yê. Ma do rojêk miheqeq ser bikewê. Seserra 21. de şarê Filîstîn û Kurdistanî semedê heqanê xo grevê vêşanîye de yê. Dinya vengê ma nêeşnewena. Birêz Ocalan 20 serrî yo tena tecrîd de yo.  Pawitoxê heqanê merdiman ça de yê. Qey vengê xo nêvejenê?  Mi ameyîşê to ra hêz girewt.  Ez zaf bîya şa. Ma do miheqeq ser bikewê. Ma şerê dinya nêveto, la ma cinî do nê şerî biqedene. Cinîyanê Kurdan  xeylî cinîyê sey Leyla Xalide û Leyla Kasime nas kerdî. Ma ewro zî xover danê. Ma  her di Leylayî do dest bidê yewbînan û ser bikewê.‘‘

Semedê Ameyoxê Qijanê Xo Ganî Ma Biciwîyê

Leyla  Xalide zî pêvînayîşê Guvene ra keyfweşîya xo ard ziwan û  nê vatî: ‘‘No mucadele wazeno ke ti tewrê ma dewam bikerê. Ti jîhat a.  Eke ti ma ya bî ma hîna benê bihêz.  Ez zî zaf şa ya ke mi to dîye. Mi to rê silamê  embazanê ma ardî. Hemrayê ma vanê ke, wa bihêz bo, ma aye dir ê. Pêvînayîşê to wezîfeyê mi yo. Cunkê ma pêroyê cinîyê xoverdayox ê. Ma semedê ameyoxê qijanê xo ganî biciwîyê.  Ganî ma rayîrê azadîye û serkwtişî de rayra şorê. Vengê ma xeylî cayan ra vila bîyo. Grevê vêşanîye yê Filîstîn û Kurdan rê paştdayîşî zêd benê. Ma do ser bikewê.‘‘

Leyla Xalide dima ra  zî  semedê zîyaretkerdişê partlamenteranê HDP’yî Dersim Dage, Tayîp Temel û Murat Sarisaçî yê ke grevê vêşanîye de yê , şîye banê HDP’yî yê Amedî.