Îqtîdaro faşîst AKP-MHP wazeno ke xo Peymana Îstanbulî ra bianco ke peymane cinîyan vera  şîdetî pawena. îqtîdar 13ê tebaxe de do peymane ser o nîqaş bikero. Perey cinîyî vejîyayî meydanan û waştişê Tirkîya û îqtîdarî şermezar kerd.

Cinîyan pankartê bi nuşteyê ''Kişîyayîşê cinîyan polîtîk o'', ''Xopawitiş cuye paweno'', ''cinîyî azadîye wazenê'' akerdî.

Hukmatê AKPyî herinda ke verê kişîyayîşê cinîyan bigêro pê vatiş û polîtîkayanê xo cinîyî kerdî hedef û kişîyayîşê cinîyan kerd meşrû. Rêxistinê cinîyan bale ancenê girîngîya Peymane ser û venga hukmatî danê ke Peymana Îstanbulî bîyaro ca.''

Bi hezaran cinîyî qezaya Kadikoyî ya Îstanbulî de ameyî pêser û pê pankartanê kurdkî û tirkî qeardar ê ke çalakîyanê xo dewam bikerê. Cinîyan nêrazîbîyayîşê xo wina ardî ziwan:

''Ziwanê şerî ziwanê îqtîdarî yo. No şer o. Peynîya ci se bena wa biba ma do têkoşînê xo dewam bikerê.''

''Ma vera kişîyayîşê cinîyan, îstîsmarê doman û cinîyan tîya de ameyî pêser. Ma seba ke hukmat apey gamêke bierzo, vengê ma berzêr bibo û vera şîdetê pîya têkoşîn bikerê tîya de yê.''

''Hêzê cinîyan xeylêk o. Hêzo tewr dînamîk zî hêzê cinîyan o. Hêzê cinîyan eşkeno dinya bivurno. AKP ma ra terseno. Ma heta ke Peymane bêra caardene kuçe û meydanan ra do fek vera nêdê.''