Platformê Cinîyan ê Dîcle yê Amedî (DAKAP) bi wesîleya 8ê Adare Roja Cinîyan ê Kedkaran a Dinya derheqê bernameyê xo de eşkerayîyêka çapemenîye kerd. Eşkerayîye taxa Ofîsî ya qezaya Yenîşehîrî ya Amedî de bi tewrbîyayîşê Têgêrayîşê Cinîyan ê Azadan (TJA), Komeleya Cinîyan a Rosa û  Meclîsê Cinîyan ê HDPyî ameye kerdene. 

Kiymete Yildiz eşkerayîye wende û îfade kerd ke ê dinyaya winasêne de ciwîyayenê ke keda cinîyan a seba felsefe, spor, sîyaset, tarîx, hunerî sey çin yena hesibnayene.

 Yildize pare kerd ke cuya têdûşte û azade bi têkoşînê cinîyan do bêra awankerdene û ê do 8ê Adare de meydanan pirr bikerê. 

Yildize hêrişê vera hemserekîye vist vîrî û îfade kerd ke ê do vera destbenkerdişanê sîyasetmedaran ê cinîyan ê kurdan bêveng nêmanê. 

Yildize bale ante serebûtê Gulîstane Doku ser ke 57 rojan ra nata vînbîyaye ya û tira xeberêke nêna girewtene. Yildize vat: ''Şexsê Gulîstane Doku de ma do vera serebûtanê vînkerdişê cinîyan, kiştişê cinîyan û kerdişanê bêmerdimîyan vinderê, têkoşînê cinîyan berz bikerê.''

Bernameyê 8ê Adare yê DAKAPî wina yo:

 4ê Adare: Saete 12:30 de verê Bînaya Polîtîkayanê Komelkîyan û Keyeyî de vera polîtîkayanê cînsîyan eşkerayîya çapemenîye

5ê Adare: Mabênê saetanê 12:00-19:00 de Dagkapi Galeria de peramotişêkê resiman do bêro kerdene. Saete 19:30 de zî Tîyatroyê Şaristanî yê Amedî de aktîvîteya tîyatroyî do bêra kerdene.

7ê Adare: Aktîvîteya ramitişê bîsîkletan do bêra kerdene. 

8ê Adare: Nawnayîş do bêro kerdene.