Hemverê tecrîdkerdişê Rayberê Şarê Kurdî Abdullah Ocalanî de çalakîyê grevê vêşanîye yê bêdem û bêagêrayîşî ya ke bi serkêşîya hemsereka KCD’yî Leyla Guvene dest pêkerdîbî roja 159’ine de dewam kenê.

Tepişteyê ke zîndanan ra ameyê veradayene zî keyeyanê xo de çalakîyanê xo domnenê. Înan ra yewe zî Naîma Çelîk a ke Zîndanê Amedî yê Tîpê E’yî de 1’ê Adare ra nata dest bi grevê vêşanîye yê bêdem û bêagêrayîşî kerd û dimayo ke 28’ê Adare de amî veradayene çalakîya xo keye de domnaye. Çelîke dimayo ke 2 serrî û 6 mengan tepişte mende û nika çalakîya xo keyeyê xo yê Mehlaya Fatîhî ya Baglarî ya Amedî de domnena. Naîme Çelîke derheqê xoverdayîş û qerardarîya xo ya çalakîya grevê vêşanîye de ANF’yî rê qisey kerd.

Çelîke bale ante ke aye zî sey heme embazanê xo 1’ê Adare de hemverê tecrîdkerdişê Rayberê Şarê Kurdî Abdullah Ocalanî de kewta grevê vêşanîye yê bêdem û bêagêrayîşî. Çêlîke da zanayene dewlete wazena bi veradayîşê çalakwananê grevê vêşanîye xoverdayîşî bişikno û 28’ê Adare de înan a serbest veradaya. Çelîke vat a ‘endamîya organîzasyonî û hetkarîya organîzasyonî’ ra ameya sûcdarkerdene û 2 serrî û 6 mengan tepişte menda. Çelîke ard ziwan ke ê heta nêresê amacê xo do bi tu hawayî fek çalakîya xo ra vera nêdê û waştişê înan zî zaf eşkera yê.

‘Ma Wazenê Rayberê Ma Heqanê Xo Bişuxulno’

Çelîke vat verî zî Leyla Guvene mehkemeya Tirkîya de amacê çalakîye ardibi ziwan û vat: “Ma çîyêkê zaf cîyayî nêwazenê. Ma wazenê ke sey heme tepişteyan Rayberê ma zî heqê xo yê pêvînayîşî bi avûkatan û keyeyê xo dir bişuxulno. Ma nika merg û ganetîya Rayberê xo ra zî hayîdar nêyê. Ma a derece de yê ke ma eşkenê seba Rayberê xo xo vêşan verdê û canê xo feda bikerê. Min û hemrayanê mi seba tecrîdê girankerdeyî yê serê rêzdar Ocalanî wedarîyo, ma dest bi çalakîya grevê vêşanîye yê bêdem û bêagêrayîşî kerd. Waştişê ma qedînayîşê tecrîdî yo. Wezîrê Karanê Zereyî û Dozgerî vanê, ‘Çira Abdullah Ocalan seba xo nêkeweno çalakîya grevê vêşanîye?’ m abi desan reyan înan ra vat. Rêzdar Ocalan kesek nêyo, Ocalan Rayberê şaran o. Ocalan şar o. Xora çîyo ke ê dest ra yeno keno. Tîya ra tepîya bar keweno doşanê ma ser. Bi nê tecrîdê girankerdeyî wazenê ke têkilîya Ocalanî şarî dir bivisnê. Tu hayîdarîya ma cuya Ocalanî ra çina. Ma seba cuya Rayberê xo biqesawet ê.”

‘Ma Nizdê Serkewtişî Yê’

Çelîke qiseykerdişê xo wina domna: “Leyla Guvene qerarê çalakîye mehkema de dabi. Hayîdarîya ma çinbî. Gama ke agêra koxuşe ma dir pare kerd. Coş û bawerîya aye biheybet bî. Tewirê aye ramot ke maç ende nizdê serkewtişî yê. Coş û moralo ke aye da ma, ma zîndan de pay ra verdayî. Dimayo ke Guvene amî veradayene ma xemgîn bîyî. La ma rind zanayêne  ke Leyla Guvene ça bena wa bibo do coşê serkewtişî bido dewamkerdene. Leyla bi tewirê xo waştişê xo bi heme dinya pêhesna. Deste şaranê Tirkîya de çîyêk nêmendo. Her kes zano ke welat de qanûn nêmendo. Çew nêeşkeno kultur û ziwanê xo biciwîyo. Ma zanê hemverê nê zextan de reakîsyonî estê. Ma vatêne do reakîsyonê hîna pîlî vejîyê werte. La nê çîyî çapemenîye de zaf veng nêda. Ewro dinya qalê çalakîya ma kena, la çapemenîya Tirkî nêvînena.”

‘Dewlete Çalakîye Ra Tersena’

Çelîke bale ante serê kayanê dewlete ke amacê ci şikitişê xoverdayîşê çalakwanan o û nê vatî: “Amacê dewlete o yo ke zîndanan de çalakîye veng vejo. 2 serrî ra vêşêr bi ke ez tepişte bîya. Rixmo ke dosyaya mi de çîyêk çin bi zî her reye înan ez bi mazeretanê vengan tepişte verdayêne. Nika zî seba ke ez fek çalakîye ra vera bidî, ez veradaya. Ê grevî ra tersenê. Seba naye kenê ke embazê ke grev de yê înan vera bidê. Bi na yewe wazenê ke çalaki nêbo pîle. Ez ewro keye de bî zî kuçe de bî zî ça bena bibî ez do çalakîya xo bidomnî. Heta ke çalakîya ma bireso amacê xo ma do çalakîya xo bidomnê.”

‘Îradeyê Xo Rê Wayîr Vejîyê’

Çelîke peynîya qiseykerdişê xo de veng da rayapêroyîye û wina vat: “Ma çewî ra çîyêkê cîyayî nêwazenê. Ma wazenê ke rayapêroyîye bivîno. Ganî şarê ma amacê ma bizano û bizano ke ma seba çîyî bedenê xo helnenê. Hendî bes o, wa şarê ma hendî çim û goşê xo akero û bivîno. Dewlete destûr nêdana ke mayî cenazeyanê domananê xo bivînê. Waştişê ma şarê ma ra o yo ke cenazeyanê xo rê wayîr vejîyê. Ma cuye ra zaf hes kenê. Qaso ke ez cuye ra hes kena ez bawer nêkena ke kes hende hes bikero. La ewro seba cuye eşkena bedene xo zî bihelênî.”