Çalakîya grevê vêşanîye ya ke 16’ê Kanûne de bi rayberîya Leyla Guvene dest pêkerd û 1’ê Adare de heme hepisxaneyan ra vila bîyî sewîyeya krîtîke de dewam kena. Azîz Tûfano ke bi îdîaya “Endamtîya rêxistine”  2 serrî û nêmo Hepisxaneyê Tîpê D’yî yê Amedî de girewteyo, 1’ê Adare ra nata grevê vêşanîye de yo. Dayika Azîz Tûfanî Aysel Tûfane derheqê rewşa lajê xo de qisey kerd.

Ganî waştişê xoverdayoxan bêrê qebûlkerdene

Dayîke Aysel Tûfane ard ziwan ke 6'ê Adare de bi rayîrê Medya Tv heşno ke lajê aye kewto grevê vêşanîye û wina qisey kerd, “Lajê mi Azîz Tûfan Hepisxaneyê Tîpê D’yî yê Amedî de yeno girewtene. 49 rojî yo lajê mi seba wedaritişê tecrîdê serê Rayberê Şarê Kurdî Abdullah Ocalanî grevê vêşanîye de yo. Vizêrî ez şîya serdana lajê xo, rewşa ci baş nêbîye. Çimanê ey şenik dîyêne. Hevalê înan ê ke 100-120 rojî yo çalakîye de yê gonîye pirnike ci ra yena. Rewşa domananê ma baş nîya. Êdî ma keye de sifre nênanê ro. Canê ma zaf dejeno. Wa kes nêvajo ke ma tersenê. Ma kesî ra nêtersenê. Seba ke bi domananê ma çîyêk nêbo çi ma dest ra bêro ma do bikerê.  Ma nika keye de sey merdan ê, bi şewe hewn çimanê ma nêkeweno. Ma keyeye xo de bîy sey dengbêjan, ma domananê rê xo şiwaran wanenê. Êdî bes o. Ganî waştişê girewteyan bêrê qebûlkerdene û tecrîdo girankerde bêro biqedênayene.”

Ma leyê domananê xo de yê

Tûfane da zanayene ke seba ke bale biancê serê çalakîyanê grevê vêşanîye, înan waşto  Parkê Koşuyoluyî de eşkerayîye bidê çapemenîye la polîsan bi hawayêkê hovîtîye hêrişê ci kerdo û vat, “Ma hîna Parkê Koşuyoluyî de nêameybî têhet, polîsan hêriş bi dayîkan û wekîlan kerd. Bi hovîtîye hêriş kerd û wekîla ma Remzîye Tosune birîndar kerde. Çi beno wa bibo ma dest dewaya xo ra nêverdanê. Ma hemverê zordestîye û polîtîkayanê hêrişkaran de çok nêşanê erd. Tarîx ra nata vera şarê Kurdan polîtîkayê zulmî yenê kerdene. Ê çiqas zulm bikerê, şarê Kurdî zî do hende sere biwedaro. Ma dayîk ê, zerrîya ma veşena. La ma sereberz ê. Ma domanê xo birûmet pîl kerdî. Seba naye zî xoverdayîşê înan zî birûmet o. Sere de şarê Kurdî, hem kesê ke destê înan ra çîyêk yeno ganî bikerê. Bêrê ma bibê vengê domananê xo. Ma rojanê zaf bizehmet û zoran derbaz kenê. Êdî ma nêwazenê rojanê xirabtiran bivînê.”

Wa Gula Kurdistanî nêçelmisîyo

Tûfane reaksîyan da bêvengîya hukmatî ya vera çalakîya grevê vêşanîye zî û vat, “Tecrîd sûcê merdimîye yo. Ganî keye û avûkatê Rayber Apoyî bieşkê şorê Îmraliyî û bieşkê pêvînayîşan bikerê. Ewro bi  mîlyonan Kurdan Rayber Apo sey îradeyê xo name kerdo. Şima qebûl bikerê û qebûl nêkerê zî Rayber Apo Rayberê Şarê Kurdan o. Wa her kes veng bido vengê girewteyan. Leyla Guvene gula Kurdistanî ya. Wa Gula Kurdistanî nêçelmisîyo. Ma Leyla û domananê xo yê girewteyan bidê ciwîyayene.”