Fermandarê Pêroyî yê Hêzanê Sûrîyeya Demokratîke  (QSD) Mazlûm Ebdîyî vat gerek Rayberê Heyet Tahrir Şamî (HTŞ) Ebu Muhammed Colanî (Ahmed Şara) derheqê hêrişanê vera elewîyan de semedê hesabpersayîşî veng bido berpirsîyaranê qirkerdişî.

Mazlûm Ebdîyê ke eşkerayîya nuştkî daye Reutersî vat gerek Colanî semedê vindarnayîşê qirkerdişan mudaxale bikero.

Ebdîyî ard ziwan çeteyê ke paştgêrê DAÎŞî yê û Tirkîya paştî dana ci berpirsîyarê verênî yê nê qirkerdişan ê û veng da Colanî ke ''metodê pêardişê artêşa Sûrîyeya newî û tewirê grûbanê çekdaran çimî ra ravêrno''. Ebdîyî vat tay grûbî rolê xo yê mîyanê artêşe semedê ''afirnayîşê pêkewtişanê mezheban û hesabpersayîşê zereyî'' şuxulnenê.

Wezîrîya Pawitişî ya Tirkîya derheqê eşkerayîyanê Ebdî de şîrove nêkerd, Wezîrîya Karanê Teberî zî cewab nêda waştişê şîroveyî yê Reutersî.