Wan de serkêşîya TJA de bi şîare ''Ma vera qirkerdişê cinîyan sere wedarenê, ver bi azadîye şinê''  mîtîngê fînalî yê 8ê Adare Roja Cinîyan ê Kedkaran a Dinya ame kerdene. Hemsereka Pêroyî ya DEM Partî Tulaye Hatimogullari û Endama Heyetê Îmraliyî Pervîne Buldan tewrê mîtîngî bîyî.

Buldane zîhnîyeto hêrişkar ê vera cinîyan şermezar kerd û vat, ''Mi şima rê selamê Birêz Ocalanî ardî.''

Pervîne Buldan nê vatî: ''No 8ê Adare yewna 8ê Adar o. Heyecanê vengdayîşê Birêz Ocalan ma pêro girewtî. Ma bi nê heyacanî 8ê Adare verwazî kenê. Tewr zaf pawitişê ma cinîyan nê vengdayîşî ra est o. Çunke no vengdayîş semedê cinîyan mîladêk o. Coka ma do pêro pîya wayîrê nê prosesî bivejê. Ma pêrune heskerdoxê xo vînî kerdî û hinî nêwazenê çewî vînî bikerê. Wa çew prosesî sabote mekero. Gerek cade gamê qanûnî ke hewce kenê bêrê eştene.''

Buldane ard ziwan ke Rayber Apoyî dayîkanê haştîye û şarê Wanî rê selamê taybetî şawitî û nê vatî: ''Birêz Ocalanî vat, 'Îradeyê ke pêro 14 şaredarîyî girewtî, ez ci rê hurmet kena.' Wan bajarêko birîndar o. Hemşaredê ma wezîfe ra ameyî girewtene. Şarê Wanî vera qeyûman hêrsê xo ard ziwan.  Ma tîya ra reyna veng danê ke wa wezîfeyê hemşaredaranê ma bêro îadekerdene.  Kurdî vanê 'Wa îradeyê ma nêro xespkerdene. Ma perwerdeyê ziwanê dayeke wazen. Wa nasnameyê bêro naskerdene.' Coka semedê hasîsîyetê prosesî gerek wird per zî dîqet bikerê. Wa qet qesawtê çewî çînê bo. Wa her kes bizano ke Birêz Ocalan xelet nêkeno.''

Tulaye Hatimogullari zî qiseykerdişê xo de ard ziwan ke ê wayîrê vengdayîşê Rayber Apoyî yê 27ê sibate vejîyenê û vat; ''No vengdayîş semedê cinîyan ronesasn o.''