Meclîsê Cinîyan ê HDPyî vera hêrişanê serê destkewteyanê înan kampanyayêka aşmêke dano destpêkerdene. Startê kampanya ewro do Anqara de bêro dayene. Çarçewa kampanya de vera îstîsmarê domanan, tecrîd, şîdet, cîyakerîya cînsî, serwerîya camêrdan, nîjadperestî û xizanî rayraşîyayîşî do bêrê kerdene.

Hewteyê verênî de vera qanûnê îstîsmarî cinîyê HDPyîjî qeza û taxan de ke tede îstîsmarî ameyî kerdene, cinîyan reyde bêrê têhet. Hewteyê diyînî de Meclîsê Cinîyan vera qanûnê înfazî û hewteyê hîrêyînî de zî vera qeyûman do meydanan de bibê. Hewteyê peyênî de zî cinîyî vera şîdetê camêrdan û xokiştişê cinîyan tay çalakî û xebatan bikerê. 

 Meclîsê Cinîyan cinîyanê alewîyan û romanan reyde zî do bêrê têhet. Cinîyî hedef kenê ke paştdayîşê enternasyonelî zî xurt bikerê coka na çarçewe de endamanê Meclîsê Parlamenteran ê Konseya Ewropa (AKPM), wekîlanê cinîyan ê Parlamentoya Ewropa, rêxistinanê cinîyan ê Ewropa, Amerîkaya Başûre û Rojhelatê Mîyanênî rê mektuban binusê, înan reyde pê kombîyayîşê onlineyî bêrê têhet.