Seba hemsereka KCD’yî û parlamentera HDP’yî ya Colemêrgî Leyla Guvene ke 161 rojî yo hemverê tecrîdkerdişê Rayberê Şarê Kurdî Abdullah Ocalanî grevê vêşanîye de ya wareyê mîyanneteweyîyî de paştîdayîş dewam keno.

Kolektîfanê Cinîyan ê Femînîstan ê Zurichî ke mîyanê kolektîfanê xinîyan ê pêroyîyan de ca gênê, seba Leyla Guvene nameyêk nûşte.

‘Ma To Dir Ê’

Mektûbe de ame vatene ke ê grevanê vêşanîye nizd ra şopnenê û ame vatene, “Ma; cinîyê Swîsreyijî seba heqanê ma yê ke ameyê desteserkerdene pey de bigêrê xebate kenê û xo seba grevê pêroyî yê 14’ê Hezîrane amade kenê. Sîstemê pederşahî Swîsre de bi rayîr û metodanê cîyayan cinîyan ser o zordarî keno. Ma zî hemverê nê de xover danê. Na amadekarîya grevî de cinîyê Kurdî zî ma dir rayra şinê û moral danê ma. Mabênê ma de sînorî estbê zî, ma seba heman dinyaya xaseke mucadele kenê. Mucadeleyê ma yê şarê Kurdî reyde do dewam bikero.

Beno ke metodê ma yê mucadeleyî û terzê zextanê ke hemverê ma de yenê kerdene yewbînan ra cîya bê, labelê ma xo zereyê mucadeleyê şima de vînenê. Xoverdayîşê şima yê grevê vêşanîye ramojneno ke îradeyê mucadeleyî ya azadîya şarê Kurdî çende xurt o.

‘Tecrîd Nêno Qebûlkerdene’

Ma rind zanê ke şima zî seba dinyayêka xaseke û ameyoxêkê azadî mucadele kenê. şima rind zanê merdimbîyayîş çi yo û hemverê polîtîkayanê dişmenê merdimîye de mucadele kenê.”

Mektûbe de ame vatene tecrîdkerdişê Ocalanî û tepişteyanê sîyasîyan tecrîdkerdişê ercanê merdimîye yo û ame vatene, “Seba qedînayîşê tecrîdî zîndanan de çalakîyî ameyî viraştene û xeylî merdimî merdî. Ma seba nê şehadetan xemgîn ê. Dewleta Tirkî û îdarekarê aye mergê nê kesan ra mesuldar ê.”

Veng Ame Dayene Bi CPT’yî

Mektûbe de veng dîya CPT û Neteweyê Yewbîyayeyî û ame vatene, “Mesuldarîya tewr pîle kewena serê doşê CPT’yî û sazîyanê bînan ê mîyanneteweyan. Ma veng danê sazîyan ke tavilî şirê Tirkîya û cigêrayîş bikerê.”

Cinîyan ard ziwan ke ê paştî danê xoverdayîşê grevê vêşanîye û veng da cimatê mîyanneteweyîyî ke paştî bidê nê xoverdayîşî. Tewr peynî de ame vatene, “Ma; cinîyê femînîstî cuye û azadîye pawenê. Heta ke ma bibê azad ma do sînoran nas nêkerê û mucadeleyê xo bidomnê.”