Hûmara newî de babetê derheqê mucadeleyê edaletî yê Mayanê Aşitîye û Mayanê Şemeyî, krîzê ekonomi û xoverdayîşê têgêrayîşê karkeran, netîceyê weçînitişî, huner, zanist û weşîye estê.

Derheqê grevanê vêşanîye de meqaleyê parlamentera HDP’yî ya Amedî Dersîm Dage û Zerya Gule, heman wextî de roportajê bi Fadîle Toke esto. Nûşteyan de ame vatene ke hemleya xoverdayîşî ya ke bi serkêşîya cinî dewam kena, oxirê azadîye de sînorê serdestan raste ra wedartê.

Hêrişê dewlete yê hemverê mayanê aşitîye ke sere de Gebze xeylî bajar û qezayan de ameyî kerdene, hetê Rojda Yildirime ra ameyî şîrovekerdene.

Xeberdare Nezahat Dogane derheqê çalakîya Mayanê Şemeyî yê ke 1995 ra nata no 735 hewteyî yo yena viraştene de nûşte.

SAMER ra Yuksel Gençe netîceyê weçînitişê cayîyî yê 31’ê Adare ercna û bale ante serê rolê bewlîkerdox ê Kurdan.

Xeberdare Necla Demîre bale ante serê tesîrê krîzê ekonomî yê serê cinîyan û da zanayene ke cinîyî qerardar ê bedelê krîzî nêdê.

Derheqê xebatanê Merkezê Kombîyayîşî yê Cinî yê Ûtamara de endama merkezê cimatnasî-pedagoge Sandra Kreîle dir roportajêk ca gêno.

Rîpelê kulturî yê rojnameyî de zî hunermenda Kurde Denîz Demane rolê hunerî tarîx ra heta ewro ercna. Demane vat ke hunerê Kurdî hemverê polîtîkayanê kolonîzekerdişî de timî xover dayo û bale ante serê hunerê şorişgêrî yo ke Hozan Mizgîne xo ra dima verdayo.

Bermal Çeme zî heman babete ercnaye û bale ante serê polîtîkayanê asîmîlasyonî yê serê ziwan, nasname û kulturî.

Hûmara Gulane de meqaleya “Raywanîya enerjî ver bi madeyî” ya Zana Çobanî, meqaleya “Laser tewr zaf cinî ser o tesir keno” ya Evîn Zîlane, dosyaya Lîlyan Çîya ya derheqê tarîxê mucadeleyê cinîyan ê Afganistanî û vîrameyîşê “Ferasetê Varane” yê Arjîn Newroze ca gênê.