Tirkîya de qetilkerdişê cinîyan û îstîsmarê serê domanan bi zêdbîyayîşî dewam kenê. Netîceyê zîhnîyetê faşîstî yê îqtîdarî  û polîtîkayanê ci yê vera cinîyan û domanan cinî û domanî raştê tacîz, tecawuzî yenê û yenê qetilkerdene.

Goreyê donayanê Jinnewsî menga Nîsane de cinî û domanî reyna hedefê hêrişê merdimanê xo de bî. tewr tay 20 cinî ameyî qetilkerdene û 20 domanî raştê îstîsmarê cînsî ameyî. 15 cinîyî raştê tacîz, şîdet û tehdîtan  ameyî. 3 domanî ameyî qetilkerdene. Mehkemayan de bi sebebê ‘halo hol‘  cezaya 5 hêrişkaran ameye warardene.

Goreyê Platformê Ma Do Qetilkerdişê Cinîyan Vindarnenê menga Adare de tewr tay 27 û Çele de zî 43 cinî ameyî qetilkerdene. Serra 2018’î de 391, 2017 de 346 û 2016 de 284 cinî biyê qûrbanê şîdetê camêrdan.