Cinîyan îfade kerd ke bingeyê kulturê elewîyan de heqê temsîlîyetê têdûştî esto la no heqê temsîlîyetî werte ra wedarîya û înan zî seba ke vera naye têkoşîn bikerê Paltformê Cinîyan ê Elewîyan ê Îzmîrî awan kerd. Elîfe Bakir, Fadîme Dogan, Nebahate Çelîk, Gulîstane Gul û Şevda Çîçek derheqê ronayîşê Platformî de qisey kerd û qala meseleyanê elewîtîye kerde.

Elîfe Bakir ard ziwan ke Îzmîr de tewr tay 15 cemxaneyî û komeleyî estê la tede heqê temsîlîyetê têdûştî yê cinîyan çin o. Elîfe vat: ''Ma zanenê ke vera ma nêrazîbîyayîşî do bêrê mojnayene. Pîranê elewîyan ma rê vatene 'Hema seba naye rew o.' La cuye pê cinîyan dest pêkena. Coka ma seba têdûştîye kewtî nê rayîrî.''

Babîyê Fadîme Dogan zî pîrê elewîyan o. Fadîme vat: ''Dadîya mi ceman de hetê babîyê mi nişena ro le heqê ci yê vatişî çin o. Babîyê mi vat ke têna heqê camêrdan esto ke postê îmam Huseyînî ser o ronişo. La Zeynep Ana Kerbela ra merdimî vetî. Komelê elewîyan de tim cayê cinîyan vernî de bi. La ewro rewşe vurîyaye.''

Hemsereka Komeleya Elewîyan a Demokartîke Nebahate Çelîk zî vat: ''Tay pîran paştî da ma la tay pîrî zî vera ma vejîyayî. Ma cinîyanê rêxistinanê elewîyan reyde têkilîye viraşte. Ma wazenê ke rayberîya cinîyan de ceman bikerê.''

Gulîstane Gul vat: ''Seke ez vînena kulturê elewîyan de cayê cinîyan çin o. La tarîxê ma de cinîyî û camêrdî tim têdûşt bîyî. Nika vatiş de cinîyî estê la kerdiş de nameyê ma çin ê. Ma wazenê ceman îdare bikerê.''

Şevda Çîçek 7 serran ra nata cemxaneyan de zakîrîye kena. Şevda vat: ''Seba ke bawerîya ma aver şêra û biba pîlêr ganî cinîyî bibê wayîrê heqê vatişî. Coka ma venga pêro cinîyanê elewîyan danê ke platformê ma reyde têbigêrê.''