Qezaya Qoserî ya Mêrdînî de Rêxistina HDPyî, Têgêrayîşê Cinîyan ê Azadan (TJA), Platformê Cinîyan ê Şahmeran, çarçewa 8ê Adare Roja Cinîyan ê Kedkaran a Dinya de şayîyêke kerde. Meydanê şayîye de Taxa Berçeme de pankarta bi nuşteyê ''Ma rêxistinîya xo kenê, ver bi azadîye şinê'' ameye daliqnayene. Wekîlê HDPyî Ebru Gunay, Pero Dundar zî tede bi hezaran cinîyî nawnayîş de amade bîyî. Cinîyan bi kincanê xo yê tradîsyonelan meydanê nawnayîşî xemilna.

Meclîsê Mayanê Haştîye ra Halîme Kaya pare kerd ke ê bi serran o ke têkoşînê haştîye kenê, ê vera şerî weriştî payan ser û nêwazenê ke merdimêk zî şer de bimiro.

Wekîle Pero Dundar zî vat cinîyî bi têkoşînî serfîraz benê û tecrîdê vera Rayberê Şarê Kurdî Abdullah Ocalanî şermezar kerd. Dundare îfade kerd ke cinîyî do faşîzm çin bikerê.

Şayîye bi deyîranê koma muzîkî yê Dengê Jinên Azad dewam kerd. Domanêkê 10 serreyî deyîra ''cila gerîla reş e'' vat û dima polîsan waşt ke doman dest bend bikerê. La cinîyan destûr nêda polîsan.