Partîya Yewîye ya Armenîyan ra Yûsif Derwêşî derheqê peymana mabênê QSD û hukmatê Şamî yê demkîyî û qirkerdişê elewîyan de ajansê ma rê qisey kerd.

Derwêşî ard ziwan ke xîret yeno kerdene ke Sûrîye goreyê hemsengîyanê mîyanneteweyîyan newe ra bêro awankerdene û vat: ‘’Her kes hêzo ke bîyo îqtîdar şinasneno. Armancê înan verarkerdişê şaran nîyo la ê qalê vurnayîşî kenê. Mabênê QSDyî û hukmatê Şamî yê demkîyî de cîyatîyî est ê. Fikr, armanc û hedefê nînan cîya yê. QSD pawitişê şaran keno û goreyê menfaetanê şaran têgêreno. La îqtîdarê Şamî yanî HTŞ wayîrê armancanê cîyayan o û wayîrê ê hêzî nîyo ke pêroyê koman kontrol bikero.’’

Derwêşî qetilkerdişê eleqîyan şermezar kerd û vat: ‘’Êyê ke Şamî îdare kenê ganî verê qirkerdişê elewîyan bigêrê. La herinda ney de nînan hêrişî vistî asta qirkerdişî. Eke ma wazenê ameyoxê Sûrîye roşnî bibê ganî qirkerdişê elewîyan nêro kerdene. Êyê ke nê qirkerdişî kenê ganî bêrê muhakemekerdene.’’

Derwêşî rexne kerd ke ‘Konferansê Dîyalogan ê Sûrîye’ de şarê Sûrîye nêameyî temsîlkerdene û vat: ‘’Feraseto yewperest do nêeşko krîzê Sûrîye çareser bikero. Peymana mabênê QSD û Şamî zî mojna ke bi ferasetê yewperestîye Sûrîye nêeşkena îdare biba. Rojawan de xoserîye est a. QSD her hetî ra rêxistinkerde yo. Ameyoxê Sûrîye modelê Îdareyê Xoserî yê Rojawanî de yo.’’

Yûsif Derwêşî bale ante girîngîya bêvengkerdişê çekan û awankerdişê sîyasetê demokratîkî yê Sûrîye ser û vat: ‘’Ganî ma welatêkê winayênî awan bikerê ke estbîyayîşê şaran tede yeno qebulkerdene û şar eşkeno bi ziwan û kulturê xo tede qisey bikero. Ganî şar bibo wayîrê heqanê xo yê xozayîyan. Ganî ma modelê Îdareyê Xoserî ra îlham bigêrê.’’