Fermandarîya Pêroyî ya  Hêzanê Sûrîyeya Demokratîke (QSD) derheqê hêrişanê dewleta tirke ya îşxalkere yê vera Kobanê û heme Rojawanî de eşkerayîya nuştekîye daye û nê vatî:

''Sûrîye kewta dewrê neweyî. Bado ke îqtîdarê Baasî rijîya xeylê waran de vengane pêame. Îdareyê Şamî dest bedilna û ameyoxê Sûrîye bewlî nîyo. Dewleta tirke ya îşxalkera ke bi serran o hêrişê herêmanê Rojawanî kena. Bêşik dewleta tirke heme hêzê xo yê hewayî mekero zî bi hewayêkê mîyanî hêzê xo yê erdî kerdî tewrê hêrişê îşxalî. Pîya bi nê îşxalî verê xo dayo Awbendê Tişrînî û Pirdê Qereqozaxî, bi vatişê bînî waşt verê xo bido Kobanê. Tîya pêkewtişê giranî qewimîyayî, dewleta tirke bi heme teknîkê xo hêrişê hêzanê ma kerd la badê panc rojan bi xoverdayîşê biheybetî yê şervananê ma heme hêrişî ameyî şiknayene.Dewleta tirke ya îşxalkere planê hêrişê vera Kobanê kena. Wazena heme Rojawan îşxal bikero. Coka sere de Kobanê heme herême de bi xeylê leşker, çete û çekanê giranan hazir pawena.

Ganî heme dinya bizano ke ma sey QSDyî pîya bi heme meclîsanê xo (leşkerî) hêzêko meşrû yê. Ma vera DAÎŞî şerêko gird kerd û no têkoşînê ma dewam keno. Heme dinya serkewtişê vera Kobanê pîroz kerd. La çi heyf ke cayê ke ma destê DAÎŞî ra girewtî ewro raştê hêrişê dewleta tirke yenê. Xora yeno zanayene ke cayo verên o ke DAÎŞ tede binkewt Kobanê ya. Înanê ke vatêne 'Kobanê kewt do bikewo' ewro çeteyanê xo verdenê Kobanê. Ma sey QSDyî bi hewayêkê qerardarî vera nê hêrişan xover bidê. Senî ke Kobanê semedê DAÎŞî bîye destpêkerdişê peynî semedê Erdogan û çeteyaê ci do wina bo. Şervanê ma yê azadîye û şaro bianor ê Kobanê do dersa tarîxî bido Erdogan û çeteyanê ci.

Na çarçewa de sere de ciwanê kurdan û ereban ganî şarê herême tehlukeyî bivîno, semedê xurtkerdişê xoverdayîşê anorî refanê QSDyî de cayê xo bigîrê. Wext wextê tewrbîyayîşê QSDyî yo.Ganî ciwanê ma semedê pawitişê herre, keye û şaranê xo tewrê xoverdayîşî bibê. Şarê ma senî ke her mehle û kuçeyê xo paweno ganî wina paştî bido hêzanê xopawitişî zî. Ganî şarê ma bi ruhê seferberîye têbigêro û xo semedê şerê giranî hazir bikero. Ma sey QSDyî veng danê şaranê Rojhelatê Mîyanênî û dinya, dostan, şorişgêran ke wa paştî bidê QSD û şarê Kobanê. Ma pêro pîya ruhê 1ê Teşrîna Peyêne gandar bikerê. Bi nê ruhî me eşkenê Sûrîyeya demokratîk û azade înşa bikerê û verê DAÎŞî bigîrê.''