Yewîya Rojnamegeran ê Cinîyan a Kurdîstanî (ROJIN) derheqê qetilkerdişê di rojnamegeran de eşkerayîyêke daye. Eşkerayîye wina ya:

''23yê tebaxe de bi hemkarîya PDKyî dewleta tirke qezaya Seyîdsadiqî ya Silêmanî de rojnamegerê kurdî kerdî hedef. Ma nê hêrişî şermezar kenê. Ma şehîdanê xo Gulîstane Tara û Hêroye Bahadînî bi rêz û minetî yad kenê, birîndaran rê şîfaya xeyrîne wazenê.

Tesaduf nîyo ke no hêriş serrgêra hêrişê vera JIN TVyî de ameyo kerdene. 4ê teşrîna verêne ya 2022yî de Edîtora Kovara Jineolojî û Akademîsyene Nagîhane Akarsel Silêmanî de amebî qetilkerdene, rejîmê Îranî 23yê temmuze de cezaya îdamî daye rojnamegere Peşxane Ezîzî. Nê çîyî mojnenê nê hêrişî xîretê nimnayîşê raştîyan ê. Dewleta tirke ya qirkere teberê sînorî de rojnamegeran qetil kena, mîyanê sînoran de zî vera rojnamegeran şîdet, teda, tepiştiş ûsn. kena.

Wa dinya bizana ke qetilkerdişê rojnamegeran qetilkerdişê raştîyan o. Bêguman Kurdîstan de hêrişê vera rojnamegeran polîtîkayê şerî yê serdestan ê. No hêrişo ke wextê îşxalê Başûrî de ameyo kerdene konseptê qirkerdişê kurdan ra cîya nîyo. Nê embazê ma seba ke îtîfaqê gêmarinî û sûcê şerî îfşa kerdêne ameyî hedefkerdene. Nê embazanê ma têkoşînê cinîyan ê Başûrî, polîtîkaya qirkerdişê cinîyan a PDK û dewleta Iraqî kerdêne xebere. No hêriş bi destekê PDKyî û Iraqî ame kerdene. 

Sey ROJIN ma visnenê vîrî ke şima do bi qirkerdiş û tedayan do nêeşkê waştişanê azadîye û demokrasîyî asteng bikerê, sereyê rojnamegeran bîyarê war, rojnamegeranê azadan vindarnê. Şima nêeşkenê vengê ma yê Jin, Jiyan, Azadî bikêmînê. Ma do bi qelema xo tim raştîyan eşkera bikerê. Ma do bi weşangerîya xo ya azade hesabê embazanê xo bipersê. Ma rêçê Rosîda, Gulîstane û Hêroyan de raştîyan vejê werte û polîtîkayanê gemarinan îfşa bikerê.

Ma venga pêro dezgehanê çapemenîye-medya yê mîyanneteweyîyan, rêxistinanê heqanê merdiman û rêxistinanê cinîyan danê ke vera polîtîkayanê şerî û hêrişanê serê rojnamegeran têbigêrê.

Ma do vîrameyîşê embazanê xo bipawê, do bibê vengê azadîye yê komel û cinîyan''