Rojnameger Nîhat Kayayî qalê têkoşînê Azîz Koyluogluyî kerd ke 27ê çeleyî de, şaristanê Ranya yê Başûrê Kurdîstanî de, hetê artêşa tirke ya îşxalkere ra bi droneyê çekdarî amebi qetilkerdene.

Nîhat Kayayî ard ziwan ke 2005 de o Azîz Koyluoglu şinasnayo û vat: ‘’2005 de wexto ke mi dest pê karanê çapemenîye kerd Aîzî perwerde dayêne ma. Ey karê xo rê hûrmet kerdêne, o rîhûyaye bi. Ey her warê çapemenîye de kar kerdêne, xeylê mesuldarîyê ey est bîyî.

Ey tim tecrubeyê xo pare kerdêne. Xeylê embazê ma ewro sayê ey ra rojnamegerîye musayê. Mîrasê Azîzî bi rayîrê rojnamegeranê ke ey ra perwerde girewto dewam keno. Ma xeylê wext pîya xebitîyayî. 2005 de Hewlêr de ma pîya xebitîyayî. Azîz jîr û jîhat bi. O eşkayêne merdiman de cade têkilîye viraze. Ey meraq kerdêne teqîb kerdêne. 

Dewleta tirke tim wina bi eşkera hêrişê rojnamegeranê kurdan kena. Tay rojnamegerî bi hêrişanê hewayî, bi metodanê cîyayan ameyî qetilkerdene. Apê Musayî ra nata nê qirkerdişê rojnamegeran dewam kenê. Wexto ke Silêmanî de Gulîstane û Hêro ameybî qetilkerdene Azîz bêveng nêmend.  19ê kanûne de zî dewleta tirke Nazim û Cîhane qetil kerdî. Embazê ma Azîz zî bi heman barbarî ame qetilkerdene.

Wa her kes bizano ke eke bêvengîye biba dore do bêra şima. Nika rojnamegerê muxalîfî yew bi yewî tepişîyenê. Yanî teda tena vera rojnamegeranê kurdan nêna kerdene. Bêvengîya muxalefet û hêzanê çepgîran bena sebebê hêrişê vera rojnamegeran.

Embazanê ma yê sey Azîz Koyluoglu, Seyît Evran ûsn seba roşnîkerdişê raştîyan xîret kerd û ê nê sebebî ra ameyî qetilkerdene. Seba tradîsyonê çapemenîya azade, seba şarê kurdî, seba dormeyanê çepan û sosyalîstan, seba muxalîfan şehadetê embazê ma Azîzî dejêko pîl o.’’