Koordînasyonê KJKyî derheqê şehadetê Endama Koordînasyonê Kongre Starî Salîha Vîyan (Hêva Erebo) û Endamê PYDyî Hogir Dirbesiye (Dilewer Erebo) de yê ke 27ê çeleyî de Başûrê Kurdîstanî de hetê droneyanê çekdaran ê dewleta tirke ra ameyî qetilkerdene, eşkerayîye daye.

KJKyî wird şehîdî bi hurmetî yad kerdî, merdimanê înan û şarê Rojawanî û Kurdîstanî rê serweşîye waşte û vat: ''Ma nê hêrişê dişmenê vera cinîyan  û kurdan bi şîdetî şermezar kenê. Ma soz danê ke ma do vîrameyîşê nê wird embazanê xo yê erjîyayeyan Kurdîstanê azadî de bîyarê ca.''

Eşkerayîye de nê ameyî vatene: ''Embaze Salîha ke serranê xo yê ciwanan de tewrê têgêrayîşê azadîye bîye, xo bi felsefeya azadîye ya Rayber Apoyî aver berde, sey derwîşêka gêrena cuyeya bimana, ciwîyaye û heta hela peyêne semedê cuyeya azade û bianore têkoşîn kerd. PKK  de xo newera afirna û semedê mûntişê cuyeya azade her parçeyanê Kurdîstanî de xebatî rayra berdî û bîye cinîya şorişgêre ya serkêşe. Xebatanê ronayîşê şorişî de ca girewt û sere de cinîyî zerrîya heme şarê ma de ca girewt.

Wextê Şorişê Rojawanî de bêteredutî verê xo da Rojawanî. Hetêkî ra vera DAÎŞî têkoşîn kerd û hetê bînî ra xebatanê înşakerdişê şorişî de keda pîle daye. Xebatanê rêxistinkerdişê cinîyan ê kurd, ereb, suryan, tirkmen û ermenîyan de aktîf ca girewt û rolo serkêş kay kerd. Seba ke paradîgmaya cuyeya azade ya Rayber Apoyî bireso cinîyan û şaran ê Sûrîye bîye pirdêk. Bi nê waştişî her vinceyê herra Rojawanî û Vakur Rojhilatê Sûrîye de gêraye û vera heme hêrişanê ke vera şarî û cinîyan yenê kerdene bêters têkoşîn kerd, tewir girewt. Seba ke şorişê Rojawanî sey şorişêkê cinîyan dinya rê bido nasdayene û şorişê Sûrîye biaçarno şorişê cinîyan xebatî kerdî û kede daye. Coka şorişê cinîyan ê Vakur Rojhelatê Sûrîye eynî wextî de embaze Salîha ya.

Ewro Sûrîye de hetêkî ra pîya bi HTŞyî reyna vera cinîyan hêrişî yenî kerdene û hetê bînî ra hêrişê dewleta tirke yê vera cinîyan dewam kenê ke wa tesîrê şorişî yo ke dinya ra vila bîyo bêro şiknayene. Waştişê nê hêrişanê faşîstan o yo ke wa îradeyê cinîyan ke vejîyayo werte bêro şiknayene. La têkoşînê embaze Salîha raştîyêka şarî vete werte ke hêrişanê dewleta tirke ra gidêr a. Na çarçawa de erjê ke embaze Salîha vetê werte pê mergî werte ra nînê wedaritene. Vîrameyîşê aye do bi serkewtişê şorişê cinîyan bibo bêmerg û daîmî. Wezîfeyê ma cinîyan o tewr muhîm pawitişê nê erjan o.

Ma sey KJKyî nê hêrişî qebul nêkenê û veng danê ke wa heme cinîyê Rojhelatê Mîyanênî û dinya vera nê hêrişan vinderê û pawitişê şorişê cinîyan ê Rojawanî girdêr bikerê. Ma veng danê cinîyan ke wa semedê muhakemekerdişê dewleta tirke ya ke sûcanê şerî kena, kampanyayan bikerî û semedê afirnayîşê cuyeya azade têkoşînî xurtêr bikerî.

Jin, Jiyan, Azadî''